امرك عجيب يامغترب

امرك عجيب يامغترب
شايل حقايبك ماشى وين؟؟؟
ما الغربة طالت يامسيكين
وانت في نص الدرب
والناس هناك ماشايلة هم
لاهم حكومة ولا لحم
سكت ليه يامغترب؟؟؟
حاول اْجب؟؟
الناس وراك دفنت اْلوف
وانت جالس تنتحب
الناس هناك هزمت
طوابير الصفوف
وازدادو نجمات في الكتوف
وانت جالس زي خروف
لا فيك لبن لافيك صوف
شعار جميل مكتوب حروف
زول مغترب
انت يا اْبوي مين اللي زيك
انت مازول مغترب
لا ليك اْرض
لا ليك راْي
لا خطة اسكان لا حزب
انت عندك حزب واحد
اسمه حوّل
اْخوك وراك راقد تعب
جاك اتصال من ناس منال
يا اْخوي حول وماتطول
جدي الخضر عضو الكلب
يا اْخوي حول
في الشهر مرتين
ود اللمين جاهو المقص
في الكليتين
خلآهو زي زول الكٍتب
يا اْخوي حول وما تطول
وجيب معاك طقم العشاء
ودهب الكضب
وانت جالس يامسيكين
الغربة طالت
وانت في نص الدرب
مرت سنين فوق السنين
لا اشتريت قطعة اْرض
ولا سقفت الغرفتين
والحالة طين
يا اْخوي صلي ركعتين
بعد الفرض
يا اْخوي حول جيب قروش
وخاتم الجنيه للسيدتين
اْم العريس واْم العروس
ولا تقول فلنفترض
اْضرب خماسيك في سداسيك
واْضرب الطول في العرض
الغربة طالت
والعيال كبرت وجالت
وانت حالك يامسيكين
والله تغني عن سوْالك
والفكر مشغول
وشايل هم عيالك وين بتقراْ
والغريب كل الحكومات
في البلد تنكر نضالك
وحتي العيال في الجامعات
يامسيكين
بدل الجنيه تدفع ريالك
ومهما تكتب اْو تقول
هذا اختيارك
لا ليك راْي ولا هناك
من يرد ليك اعتبارك
شد حيلك واشتغل
عشرين شغل خارج مجالك
شد حيلك والثغور راجاك كتيرة
ست البنات صارت مديرة
ولسه ما جاها العريس
والبيت ملان
ناس محاسن وناس سميرة
يابا ماتخليك معصلج
وانت ماتخليك عويرة
وما مهم ود اللعم
ومامهم من القبيلة
المهم اْبقي راجل
وما اْكون زولا خميلة
اْلم اْقل اْمرك عجيب يامغترب ؟؟
جيت شباب تلبس خفيف
حتي في عز البرد
بعد السنين الجلود اتكرمشت
واْصبحت ودعم القرد
وآخر المطاف السنين
صارت عجاف
شالوك مقفل في طرد
وآخر المطاف السنين
صارت عجاف

شالوك مقفل في طرد

امرك عجيب يا ماستر

تغيب ولما ترجع تخطف اللقمة من خشمي ؟

قصيدة رائعة , روعتها انها تضع المغترب امام مرآة تريه ما لا يريد ان يراه

وصلتني اليوم بالايميل ورتبتها ونسقتها وقلت اقشر بيها اليوم في المنتدى .. جيت لقيتك خطفتها , انشاء الله ما تنفعك

حمد الله على السلامة وانشاء الله الجيت منهم طيبين

أهه جبت لينا شنو معاك من عطبرة ؟

الى كل مغترب يا رب يرجع الى ديارة سالم غانم

حبيبنا الرائع ماستر
ياخوي حمدا لله علي السلامة طولت مننا شديد
ان شاءالله الاجازة ممتعة وانا عامل دعاية ليكم انت وابوزحل
انو معاكم مفاجات وابوزحل قال المفاجات معاك يالله ياحبيبنا
نحنا في انتظار الصور علشان نبل شوقنا شوية

الاخ ما ستر
حمد الله على السلامه
الجيت منهم طيبين انشاء الله
انت وسيف الليله اديتو المغترب حقو بالزياده
لكن قصيده رائعه تجسد حال المغتربلا تنقص منه شيئا
اريتنا نعتبر ونرجع نحصل قبل فوات الاوان
رد الله غربتنا وغربتكم سالمين غانمين

ماستر كتب:: امرك عجيب يامغترب
شايل حقايبك ماشى وين؟؟؟
ما الغربة طالت يامسيكين
وانت في نص الدرب
والناس هناك ماشايلة هم
لاهم حكومة ولا لحم
سكت ليه يامغترب؟؟؟
حاول اْجب؟؟
شالوك مقفل في طرد
وآخر المطاف السنين
صارت عجاف

الأخ عماد لا لا لا ده أكتر من عجيب لما يرجع المغترب يلقى أبوهو مات وأمو كمان قربت الفوات لا لحم ولا رحم إيش رأيك ؟
شالوك مقفل في طرد

اخى العزيز ابو ورده مساك الله بالخير
اكيد شئ محزن لكن نقول الله يسهل امورنا
ويرجعنا بالسلامه

والله عجيب يارائع المغتربين لارحم لا فائده حتى الواحد يغترب يرجع يلقى أبوه أم لأنه ناتت مساكين والله