قصة مشروع دواجن النتاش

زائر

بعد مشروع قدرة الفول الناجح اليكم مشروع الدواجن الانجح

سمعت هناك بنك اسمو بنك الاسرة بيدعم الناس انت عليك تحدد المشروع وتعمل الاشياء الاولية للمشروع وهم بيتمو ليك الناقصة
شيلت حالي ومشيت وقلت اشوف الناس ديل والبقدرو يعملو شنو والمطلوب شنو قابلتهم وسالتهم ياناس عايز اعمل مشروع بتدوني شنو
قالو يازول اول حاجة انت مشروعك الداير تسوي شنو اخوكم اتلفت كدا وقال ليهم مشروع دواجن ردو عليا بابتسامة وقالو جميل
المطلوب منك يازول اولا توفر مكان للمشروع قلت ليهم عندي ارض مساحتها 450 متر قالو جميل جدا تقوم تسور الارض دي
وتعمل اقفاصك قلت ليهم طيب انا لمن اعمل السور واعمل القفص واوصل المويه والكهرباء كمان انتو بتسوا شنو تاني وين الدعم
قالو نحنا علينا بالدجاج انت قايلو شئ ساهل الدجاج دا وكمان بنديك باقي مقومات تربية الدجاج يعني يازول شئ منك وشئ مننا
قلت ليهم افكر في الموضوع واجيكم راجع مشيت صليت واستخرت الكريم ولقيت المشروع فيه فائدة اتوكلت علي الواحد الاحد
ومشيت لاصحابي قلت ليهم الحاصل كدا وكدا والموضوع دا فيه فائدة حتي لناس الحي دايركم تعملو معاي نفير علشان اسور الحوش
واحد من كسارين المجاديف نطة وقال انت ياخوي ماخايف من انفلونزا الطيور تلم ليك في الدجاج دا وتعدمو الحبة ويجو ناس بنك الاسرة
ويقولو ليك نحنا ماعندنا دخل بس دايرين حقنا قلت ليه ياخوي امبارح في بيت ناس سيف اتغدينا بشنو قال اتغدينا بفتة بتاعة سليقة دجاج
ومن فوق قوز الفتة خاتين لينا دجاج محمر طيب ياخوي لمن ضربت الدجاج دا ماخفت من انفلونزا الطيور قال الراعي رب العالمين
قلت ليه مشروعي دا برضو راعيه رب العالمين بعنايته ولطفه علي عباده انت ياخوي لوماداير تساعد امسك خشمك دا عليك
قام الجماعة كلهم قالو داير تبدا العمل متين قلت ليهم ماشئ اسة ابل الحيضان لدق الطوب قالو ارحكاكا نمشئ سوا وبسمالله نبدا
واحد قال انت بكرة من الصباح تروح لناس الموية يوصلو ليك الموية علشان الموية بتاعة الجيران بعيدة منك وماتخاف بيوصلوها ليك سريع
اصلا اليومين ديل مافي واحد داير مويتهم ومتوفرة عندهم بكثرة يعني يمكن بكرة العصراوية النفير نشتغلو منها قلت ليه تبقي حاجة حلوة خلاص
المهم الجماعة ماقصرو النفير شغال كل عصراوية ويوم الجمعة والسبت علشان العطلة شغال من الصباح وتم السور ورحت لناس الكهرباء
قلت ليهم داير اوصل كهرباء مشو معاي عملو معاينة قالو العمود بنوصلو بس نوصل ليك كيف من العمود لازم تسوي ليك غرفة
وتاني رجعنا للنفير وعملنا الغرفة وبقت فائدة منها نوصل فيها الكهرباء وتبقي مستودع وسالت اصحابي مافيكم واحد بيعرف ليه واحد في الصناعية
يعمل لينا الاقفاص دي بالتقصيد هنا نطا اخوي شقيقي وقال انا عندي ليك واحد بيديك الحديد والزنك والسلك بالتقصيد المريح كمان
قلت ليه جميل جدا طيب البيسوي الاقفاص منو قال عندي ماتشيل اي هم والحمدلله اتسهلت كل شئ حتي الاماكن الفاضية من الحوش اتزرعت وخضرت
مشيت لناس بنك الاسرة قلت ليهم انا جاهز يالله ادوني الدجاج ومقوماته قالو لازم نسوي معاينة ونشوف المحتاجو شنو والكمية قدر كيف
الجماعة ماقصرو المهم المشروع بقي اخر روعة وجمال قلت اتفنن شوية بقيت اضبح الدجاج واختو في اكياس وابيعه لناس الحي
وشوية شوية بقيت اودي للسوبرماركتات والسوق غالبته بقي يطلب مني قلت لازم اميز دجاجي عملت ختم للدجاج واكياس مطبوعة
بماركة النتاش والغريبة اسواق الولايات بقت تطلب مني كميات فقمت بتوسعت المشروع وبقت عندي ايدي عاملة كتيرة
لوعايز تكرم ضيفك ماتحتاس عليك بدجاج النتاش احذرو التقليد

زائر

ابدااااع وامتااااع ياالنتاش
خلى بالك من ناس الضرايب

مشروع جميل جدا ربنا يوفق في كل خطوه يساعدك فيه وان شاء الله لما نحضر لى السودان سوف نشترى منك باذن الله يارب ربنا يساعدك كثير

اخونا ود الغريبة
لك التحية
المشاركة في منتدى الحفلة التنكرية يكون بغير الاسماء الحقيقة ..
يمكنك الاطلاع على ماهية الحفلة التنكرية والهدف منها هنا :
https://atbara.ahlamontada.net/montada-f31/topic-t5471.htm?sid=f0bdc6b113702d2a43fb14fd43e10fdb

زائر

شكرا ليك شمهروش علي الاشادة

البخليني انطط من مشروع لمشروع شنو خوفا من بعبع الضرائب
المفروض يدوني حوافز ويعفوني من ضرائبهم دي لانني بوفر فرص عمل
بقيت اشغل خريجين الجامعات المرميين تحت الضللة

مساعد المدير الله يديك العافية
متابعة جيدة منك الظاهر الاعضاء كلهم لم يستوعبو الفكرة

زائر

بالله يالنتاش شغلني معاك في أي وظيفة

إنشاءالله ضباح

زائر

اهلا بيك سابح وخليك سابح مع النتاش
الضبح انا ماسكو بنفسي بس داير مناديب توزيع لدجاج النتاش العلي الحلوين مايغلاش
رايك شنو مندوب دي حلوة وراقية ذيك كدا وفيها نسبة كويسة مع الراتب

زائر

خم وصر يا النتاش

وصل سعر كيلو اللحوم الداجنة إلى 15 جنيه

إذا كان الناس في الماضي يربون الدجاج في بيوتهم، فإنهم الآن يشترونه من الأسواق، لكن من يصدق أن يصل سعر الكيلو إلى 15 جنيها، بدلا عن عشر جنيهات قبل فترة وجيزة.

كل منا يتذكر أن بيتهم كان فيه قفص دجاج، الآن يندر هذا الشيء.

وتقول التقارير الواردة من بربر وولاية نهر النيل بشكل عام أن أسعار اللحوم الداجنة بولاية نهر النيل شهدت ارتفاعاً ملحوظاً حيث بلغ سعر الكيلو 15 جنيهاً بدلاً عن عشر جنيهات، وقال رئيس غرفة الزراعة والإنتاج الحيواني بالولاية خالد السقد إن ارتفاع أسعار الدواجن أثر على مبيعاتها بأسواق الولاية.

وعزا في تصريحات لقناة الشروق التلفزيونية التي تبث من دبي أسباب ارتفاع الأسعار إلى توقف عمليات استيراد الذرة الشامية التي تشكل نسبة 60% من حجم مركب أعلاف الدواجن. مطالباً الجهات المختصة بالإسراع في استئناف عمليات الصادر من المحصول.

وارتفع إنتاج السودان من الدواجن إلى 45 ألف طن من الفراخ اللاحم، فيما بلغ إنتاج بيض المائدة 60 ألف طن في العام، فيما شهدت أسواق الخرطوم ارتفاعاً في أسعار الفراخ بواقع 12 جنيهاً للكيلو.

ويقول منتجون إن تصاعد الطلب دفع الأسعار نحو الارتفاع، وإن سبب الارتفاع يتمثل في عدم توفر الأعلاف، وارتفاع أسعار العملة، وندرتها، وإنتاج الشركات في وقت واحد، وعدم التنسيق فيما بينها.

خاص – صحيفة بربر

-----------

تخريمة لناس عطبرة

لو غلبكم تجيبوا اخبار عطبرة ..

هاكم اقروا اخبار بربر هنا :

http://berberpaper.com/

زائر

رافة وحب باهلي الطيبين النتاش يكسر الاسعار
مازالت اسعار دواجن النتاش الكيلو بعشرة
النتاش جاكم ياتماسيح السوق وممنوع البيع بالجملة
حتي لايستقل التماسيح السوق خلوكم مع النتاش الاسعارو مادايرا نقاش
شكرا ليك ياشمهروش للاهتمام باخوك وما عندك اي مشكلة اي كمية محتاجها تعال شيلها

زائر

اوعي يانتاش بدنا تكسر الاسعار اكثر واكثر

الاو اكلم جيش من البعاشيم ويجولك وتبقي سلاك بيض

ابو البعاشيييم

زائر

يانتاش انا مابخيك ان كان اتخلت عنك انفلونزالجداد
او تبقي ترزي قصة مشروع دواجن النتاش Affraid

زائر

ماصدقنا وعملنا علاقات مع الجن شمهروش

كمان جابت ليها بعشوم الله يحفظ مشروعي منك
قالو الزمن دا الدجاج المسوم بديكم طاقة والاسلاك الشائكة بقت لعبتكم
وريني اسوي معاكم شنو انفلونزا الطيور قدرنا عليها بس انتو ياولاد الليل حلي معاكم شنو
الليلة ياشمهروش يفكني من البعشوم دا الفكا بلة

اعمل حسابك من مهرجى مربع ستة لايحرقوا لك دجاجك

ابو فرح كتب:: اعمل حسابك من مهرجى مربع ستة لايحرقوا لك دجاجك

لا يزال الاستثمار محفوفا بالمخاطر في السودان يا ابو فرح
التخطيط الحضري يحتاج الى سياسة طويلة النفس
بينما صناديق الجباية لا تتحمل الانتظار
امنياتنا لكم برد حقوقكم كـــــــــــاملة

مع انو النتاش انكشف
لكن نوريكم اخر التطورات لمشروعه الناجح
بعد غزو السوق بالدجاج اللاحم والدجاج البياض قام النتاش بغزو السوق بالدجاج المشوي بالطريقة الحديثة
واديكم الطريقة لشوي الدجاج في عصر السرعة بتاعنا دا ولابد من مجاراة العصر
قصة مشروع دواجن النتاش 2351311179166892

والله بدا مافضلكم الا تعملونا طريقه للدجاج يبيض ويفقس مع بعض

محمد عبد الله عبد الجليل كتب:: والله بدا مافضلكم الا تعملونا طريقه للدجاج يبيض ويفقس مع بعض

اصبر شوية بس جايين عليها في مرحلة المشروع القادمة

» قصة بداية فول النتاش المادايرلو نقاش
» مشروع بنك الملابس
» مشروع فرحة العيد
» مشروع فرحة الصائم للعام 2011