حاج صالح والامريكية الكافرة

إنطلقت زغرودة فرح صاخبة من بيت حاج صالح مسافرة عبر بيوت الحِلة لترتطم بالجبل القابع في الناحية الغربية ليترجمها بدوره ويردها للحِلة في شكل صدى غازل كلّ أُذن صاغية أو لاهية ليخبرها أنّ كمال ود حاج صالح نجح للجامعة.
ثمّ أعقبتها زغرودة ثانية وثالثة لِيتدافع أهل الحِلة إلى بيت حاج صالح وحاجة البِخيتة لمباركة نجاح ولدهن كمال...
إستطاع كمال بذكائه ونباهته أن يجتاز المرحلة الجامعية بتفوق ليواجه مرحلة من أصعب المراحل في حياته، ألا وهي رحلة البحث عن العمل.
رغم تفوقه لكنه فشل في الحصول على عمل. تذكر كمال في غمرة محنته تلك الزغرودة التى ارتدت من قمة الجبل يوم نجاحه وهو يرى آماله العراض ترتطم بجبال المحسوبية والرشاوى والفساد وترتدَّ إليه خاسئة وهي حسيرة.
التحق كمال بشركة (لاف ساكت التجارية)، وأصبح مدوّر طاحونة مع الخريجين في الأزقة والحواري، والكل منهم يفكر في المخارجة إن شاء الله لواق الواق وقد توزعوا على الركشات والأمجادات والهايسات ما بين سواق قدير وكمساري شِفِت...
بعد عدة محاولات استطاع كمال أن يصل إلى إقناع حاج صالح وحاجة البخيتة بفكرة السفر إلى أمريكا البقت حلم الوليدات لحدهن، زي ما بتردد بت الحاج دايماً في الحِلة.
حاجة البخيتة مرقت الدِهيبات الداخراهن لليوم النفر ده وحاج صالح رسّل البلد باع عيدان الأرض والبِقيرات بعد أن حصل كمال على التأشيرة لأرض الأحلام.
مرّت الأيام كالخيال أحلام، ليجد كمال نفسه في رحلة بين طيات السحاب كانت نهايتها في مطار (جى آف كندي).
استقبله الأصحاب وأولاد البلد، وطوالي أخدوهو على الشقة.
بعد فترة راحة لمدة ثلاثة أيام ما كان على كمال إلا أن ياكل نارو ويواصل رحلة البحث عن العمل التي بدأها في السودان.
الجماعة ما قصروا معاهو، شبكوهو ليك وصايا: شوف يا كمال، البلد دى هنا ما زي السودان. ما تمشي تعمل فيها قلبك حار يشوتوك.: أسمع يا مان، الجماعة ديل هنا لو إشتغلوا معاك مفكات أعمل فيها ما سامع يا مان ...إقنورزم.
أعمل حسابك من الـ42 وهارلم، والبرونكس يا مان دي محلات خطره.
صبح كمال متسكع بين البرادوي في منهاتن، وفلتون إستريت في بروكلن من دكان يماني لدكان يماني حتى تحصل على شغل مع أحد اليمانية.
لم يكن كمال مرتاح للشغل مع اليماني، نسبةً لأنّ اليماني بيبيع القناني.
ظلّ مداوم مع اليماني على مضض إلى أن تحصل على شغل مع يهودي في دكان لبيع الملابس (ديسكاونت).
أصبح كمال مرتاح للشغل الحلال رغم إنه ساكن في برونكس والشغل في بروكلن وبيقضي يومو كلو من ترين لترين أبو صلعة أصبح وآفد رسمي على حاج صالح وحاجة البخيتة من قِبل كمال.
كمال يشيل ويرسل، والحاجة ما مقصرة مع الحاج تشيل وترشد فيهو شى دمعة جداد، شى لحمة محمرة، شى قراصة بالسمنة والسُكّر، تُرمسة الشاي مطنبجة اليوم كلو وسُكريّة السُكّر مقوزة سُكّر، والحاج يشيل ويطعِم ويجغم، ويضرب في المِلحات والقراريص والزلابية.
سكريهو طاير السماء، والدغت رادمو حد الردم، والرطوبة مخلياهو يجرجر في كرعيهو يااااا الله.
كمال يشيل ويرسل في أب صلعة، وقدر ما يضرب تلفون الحاج يشتكي من الأمراض.
مرّت السنين وبداء كمال يفكر في الوالد والوالدة والبلد، ودرب الرجعة. لكن يرجع كييييف؟
لو رجع بدون ورق ما عندو طريقة تاني يدخل أمريكا. طيّب يعمل شنو؟
الجماعة نصحوهو إنو يتزوج زواج بيزنيس Business . والفكرة وقعت لكمال تب.
في رحلة البحث عن عروس ورق، التقى كمال بمليسا.
مليسا فتاة في مُقتبل العمر وعنفوان الشباب، ممشوقة القوام، على قدرٍ كافٍ من الجمال، خفيفة الظل، وتعمل في مجال التمريض.
ده كلووووو كمال ما عندو فيهو غرد، لكن مغرود بالحيل في الورق. إتفق كمال مع مليسا
على 2000 دلار.
بدأت إجراءت المحاكم وكان لابُد أن تتخللها لقاءات بين كمال ومليسا. دوّرت التلفونات بيناتهن، وهاك يا لقاءات في المقهى الفلاني، في الحديقة الفلانية، في شقة مليسا في منهاتن، ومدورين نقاش جاد بخصوص الورق. تكررت اللقاءات وبدأت الكُلفة تترفع شويّة شويّة إلى أن شعر كمال بعواطفه تنجرف نحو مليسا. ظلَّ كمال يقاوم عواطفه التي إعتبرها من عمل الشيطان، لكن يبدو أنّ شيطان العاطفة قد تملك مليسا من الجانب الآخر، ظلت هي الأُخرى تحاول طرد الهواجس من دواخلها.
أصبحت كلما ترى كمال تزداد ضربات قلبها فتردد بينها وبين نفسها: اووووه نو...اوووووه ش........ت...
كان لابُدّ من البوح والمصارحة لتصبح أُسطورة أبو الداردوق جد جد. بدل زواج الورق أصبحت مليسا زوجة كمال شرعياً، لتتحول بقدرة قادر من مراة ورق، لمراة راجل.
كان لابُد لكمال أن يشتقّ من إسمه إسم يكون خفيف على أولاد وبنات جون نسابتو. فقام بتعديل إسمه إلى (كوما سوما) بدل كمال ود صالح.
بعد عدة اتصالات تردد فيها كمال بمصارحة الوالد، إتوكل وراح فاكي ليهو البص. ثارت ثورة حاج صالح، والحاجة تحاول أن تهدي ثورته من خلف دموعها لكن دون جدوى.
صلايب السكري زادت والدغت طار السما، والمُسكن الوحيد كان أب صلعة.
بعد أن تحصل كمال على الجنسية قرر أن يصحب زوجته لزيارة البلد والأهل. حاول كمال المستحيل لإقناع والده السماح له أن يأتي برفقة زوجته لكن باءت كلّ محاولاته بالفشل الذريع، وإنفتحت الواسطات والأجاويد على حاج صالح.
حاج العوض: يا حاج صالح إستهدى بالله. يازول البتسوي فيهو ده غلط، والزواج أصلوا قسمة ونصيب.
حاج صالح: يا حاج العوض ده كلام ده! دايرني كمان أخليهو يجيب لي الكافرة في البيت؟.
حاج العوض: يا حاج صالح الله يرضى عليك لا تكسر خاترو، الولد مشتهيكم وداير يجي يشوفكم.
حاج صالح: اليجى برا. الكافرة دى لا تجي معاهو.
حاج العوض: عاد ده كلام ده يا حاج صالح؟ كمان هو مو دايركم تشوفو مرتو.
حاج صالح: شافا بلا يخمها. كمان قال أسما مريسة! شفته المصيبة الوقعت فوقنا يا حاج
حاج العوض: ما هو برضو ولدكم
العوض!؟. كافرة وأسمها مريسة ودايرني أدخلا بيتي؟ أنا عاد مانى حالف الكافرة مابتجي داخلة هنا.
المهم بعد رجّة، وبعد تحنيس حتى وافق حاج صالح أن تحضر مليسا مع كمال...زفّ كمال الخبر لمليسا التي لم تستطيع أن تتمالك نفسها من الفرحة، فهي في شوق شديد جداً لزيارة السودان والتعرف على أهل كمال رغم علمها برفض حاج صالح لها. تعلمت مليسا بعض المفردات العربية، وقامت بتجميع كميّة من الأدوية وموازين للسكري والدغت لتأخذها معها لمساعدة الناس في البلد.
في اليوم المحدد شدّ كمال ومليسا الرحال للسودان. كان كمال طوال الرحلة يحاول تهيئة مليسا للوضع في بيتهم ، وإستقبال والده لها الذي سيكون في غاية البرود. مليسا كانت متفهمة الوضع تماماً ومهيئة نفسها
للتعامل مع الصعاب التي ستواجهها.
حطت الطائرة في مطار الخرطوم، وظهر كمال ومليسا. كان إستقبال الأهل لكمال حافل جداً، عداء والده الذي إستقبله إستقبال عادي جداً، في نفس الوقت الذي إستقبل فيه مليسا إستقبال بارد جداً. سلّم عليها بطرف أصابعينو، ولم يخفي كِجنته لها...
مرّت الأيام رتيبة، وجو البيت مكهرب في الوقت الذي تحاول فيه مليسا كسر الرتابة وإزالة الحواجز بينها وبين نسابتها، وحاج صالح موجوع وجع شديد جداً وكلما سنحت له الفرصة مع كمال يعاتبو: ده آخر تربيتنا ليك يا كمال! تجيب لنا كافرة في البيت؟
كمال: يا أبوي لكن...
حاج صالح مقاطعاً: لكن شنو؟ شوف، تانى وكت تدور تجينا تجى براك. الكافرة دى لا تجيبا لينا.
كلما يحاول كمال يتفاهم مع أبوه، حاج صالح يقاطعو: أها داير تقول شنو؟ بعد جبلنا كافرة غزيتا في البيت!. الكافرة دى المرّة الجاية ما تجى معاك. المهم ..كرهوا ليك الإجازة.
قرر كمال السفر إلى بورتسودان لمدة إسبوعين في مهمة، بينما آثرت مليسا أن تقعد مع نسابتها في فترة غياب زوجها.
حاجة البخيتة ما زالت متوصية بالحاج الذي يبدو إنه في يوم من الأيام ضرب ضرب شديد جداً في زلابية الحاجة وتورت فوقو السكري والدغت والنحار وجميع أنواع الأمراض.
حاولت مليسا بحكم خبرتها في مجال التمريض المساعدة لكن حاج صالح حلف الكافرة ما تقربو بعد إشتداد المرض عليهو أقنعوهو بأن ياذن لمليسا فوافق على مضض.
بدأت مليسا معه العلاج بروح ملائكية ترد الروح والغمّة تزيلا، وقامت بوضع برنامج يومي كامل لحاج صالح يبدأ بوجبة خفيفة في الصباح الباكر تعقبها تمارين رياضة خفيفة، مع المداومة الكاملة على قياس الدغت والسكري. وجبة الغداء تقدم له مع مراعاة القيمة الغذائية بعيداً عن مهيجات الدغت والسكري
وكذلك العشاء.
كانت مليسا تقوم بكل هذا بروح طيّبة جعلت حاج صالح يرتاح لها من جووووه قلبو، وكان يكون دوماً في حالة تشوق شديد لتمارين الصباح الرياضية التي كانت عبارة عن السير لمسافات تتخللها عشرة ونسة ظريفة بين الحاج ومليسا، يحاول فيها حاج صالح تعلم بعض مفردات الإنجليزية من مليسا، ومليسا تشيل
وتحفظ في كلامو وهي تمازحه وتضاحكه مرددةً بعض المفردات التي تسمعها منه بلكنة مكوجنة، وحاج صالح يقول لها ضاحكاً: أمانة ماك ممسوخة.
وهي تردد: ممخوسة هاج، ممخوسة.

حاج صالح كان عطشان وجاهو الري. فرهد وإنتعش وضاق طعم العافية بعد أن فارقته سنين عددا. أصبح اليوم كلو دارش ونسة مع مليسا، وعادت البهجة لجو البيت، كما عادت الصحة لحاج صالح، وأصبح يفر سن سن بسبب وبلا سبب ضارباً بالقاعدة عرض الحائط
بعد أن قضى كمال مهمته ورجع، ذهب ليجلس مع الحاج في الديوان، وكان قد لاحظ عليه علامات الارتياح وسريان الصحة في جسمه.
سأل كمال والده مستفسراً:
أها يا أبوي، إن شاء الله الكافرة دى تكون إنسترت معاك، في سفرتي دى؟
ردّ عليهو حاج صالح بسرعة وهو متعجب غايةالعجب:
كآفرة!!! يا ولدي على بالطلاق كافرة أُمّك
المدموسة بهناك دى...
والله قال كافرة قال!!!!!!!!!
هههههههه أكان قعدت معاهو شهرين ثاني كان علق الصليب فوق صدرو عديل كده ... الحاج مخو اتلحس
ـــــــــــــــــــــــــــــــــــــــــــــــــــــــــــــــــــــــــ
(عظيمة أنتي يا أمريكا .. رغم أنف الهادي الذي أعجبته القصة ولكنه استحى أن ينزلها فارسلها لي بالايميل .. اعترف يا الهادي)

كدى ورونا القصه دى حقيقيه ولا خيال عشان اعمل حسابى

تعمل حسابك ليه ؟
ماشي امريكا ؟

القصة رمزية ولكنها حقيقة واقعة بيننا كل يوم ..
يتمنعون عن امريكا ثم لا يلبثوا أن ينشدوا ودها ..
قصدي زي الهادي الشغيل مثلا tongue

سيف الدين كتب:: تعمل حسابك ليه ؟
ماشي امريكا ؟

القصة رمزية ولكنها حقيقة واقعة بيننا كل يوم ..
يتمنعون عن امريكا ثم لا يلبثوا أن ينشدوا ودها ..
قصدي زي الهادي الشغيل مثلا

أمريكا عندنا فيها رأي لكن بيني وبينك اللوتري ما بناباهو

والله ضحكتونى
ماماشى امريكيا بس اليومين ديل شغال مع مجموعه من الامريكان والهنود والجماعه بيقولو لى تمشى معانا وخصوصا الهنود اقصد الهنديه

بمناسبة اللوتري ..
السنة دي الكمبيوتر غلط ومقلب الجماعة ..
وتم الغاء النتيجة , تخيل اسمك يطلع وبعدين يقولوا ليك الكمبيوتر غلط لاول مرة منذ الستينات
.. امريكا خربت يا جدعان ..
(مصدر الخبر هنا)

نهدي لهم اغنية الطيب عبد الله

بالامل صبرت قلبي وعشت في دنيا الاماني
اهدهد اللوتري بين ضلوعي واترجم الالام اغاني
لا نفع دولاري السكبتو ولا شفع عندك محامي

والله دا خازوق كبير تنتظر من الستينات وتطلع فشنك ساكت
اوع تكون قاعد عاطل المده دى كلا راجى اللوترى
نحنا جاتنا لحدى عندنا وماعندنا النيه نمشى من عطبرة دى شبر واحد خلى ابقى راجى اللوترى

سيف الدين كتب:: .
بدأت مليسا معه العلاج بروح ملائكية ترد الروح والغمّة تزيلا، وقامت بوضع برنامج يومي كامل لحاج صالح يبدأ بوجبة خفيفة في الصباح الباكر تعقبها تمارين رياضة خفيفة، مع المداومة الكاملة على قياس الدغت والسكري. وجبة الغداء تقدم له مع مراعاة القيمة الغذائية بعيداً عن مهيجات الدغت والسكري
وكذلك العشاء.
كانت مليسا تقوم بكل هذا بروح طيّبة جعلت حاج صالح يرتاح لها من جووووه قلبو، وكان يكون دوماً في حالة تشوق شديد لتمارين الصباح الرياضية التي كانت عبارة عن السير لمسافات تتخللها عشرة ونسة ظريفة بين الحاج ومليسا، يحاول فيها حاج صالح تعلم بعض مفردات الإنجليزية من مليسا، ومليسا تشيل
وتحفظ في كلامو وهي تمازحه وتضاحكه مرددةً بعض المفردات التي تسمعها منه بلكنة مكوجنة، وحاج صالح يقول لها ضاحكاً: أمانة ماك ممسوخة.
وهي تردد: ممخوسة هاج، ممخوسة.

بيان واضح وبرهان جلي يبين ان الدين المعاملة ما كفر من احسن المعاملة

» شاعر (يابا حرام) زكريا صالح في بوح خاص لـ (دنيا الفن)