قصائد حلمنتيشية روعة

شربت الشطه يا انت
حبيبتي
I love you
ومن حبك
I shall die
من شِدّة ما إنتِ
beautiful
شعري الفي راسي
fly
I see
في عيونك
sea
I can't swim
براي
when I see you
في الـ
road
going to the shop
بي جاي
cutting the
زلط
on foot with shoes small and high
I don't know what I can do
I can't believe my eye
سماحتك عقّدتني عديل
أعاين ليك دموعي تسيل
أكُر في الحمدو عشرين مرّة
وأقرى معاها سورة الفيل
ولمن تمسكي المنديل وتمسحي بيو كحل عينيك
لمّي الدمعة فوقوا تسيل
أعاين في عيونك ديل
وأقول أريتني كان منديل
ما بنفع كلام يا ريت
نوعي ده ما شَبَه منديل
ملامحي قريبة للصارقيل!
كيفن بس أكون منديل
ولمّا تقومي منعدلة
وتقدلي ليك كم قدلة
أفنجط بي وراك ســــــــــــاي
التقول سخلة
أعاين وأقول هَمَلة
وحلاة القدلة في أهلها
حليوه وتمشي بي جَهلها
وتتقصّد مشي الأصلة
وأنا الفجغوني بي عَدلة
أنا اليادوب في دنيا الريد
مناي يا رب سلام في الإيد
عيونك زي عيون الصيد
كُبار زي خروف العيد
تكهربي بيها خلق الله
ونوعي ده عاد جنونو يزيد
وأقول يا رب تسلّم لي أو ساكت
تأشّر لي، وكان غمزت ده يوم العيد
وعينيك طالعا بينها طوّاف
لا الكبكابة لا الرجّاف
تقول رشّوني بي البفباف
يجيني رعاف
وأقعد ألف، عيوني ترِف
وأقول أكيد ده أثر فطور الفول
لمنّ تضحكي في نُكته
التقول لبعوني بي شنطة
وأكب فوق العصير شطّة
وأقرطع ما أسيب نُقطة
وأقول : يا سلام عصير لُقطة
وإنتِ تقولي : بالغت وشربت الشطّة يا إنتَ
مالها الشطّة، ما شربات عصير كُفته
عصير جركان من الدُكّان
يترشّه في صحن فتّة
ما مهم شرابي الشطة
والمهم الكلمة "بالغت
و شربت الشطّة يا إنتَ

الاشترووجع الضرس

للكاتب الرائع الساخر ودمحمد مصطفي

(وجع الضرس) يجي للعدو الما صليح. يساهربك بالليل وينتح الصباح ويسويلك وجع

الراس الضهر يقلقبك العصر .. أجنا أسي أكان وديتني الخرتوم قلعتو وأرتحت منو ما أخير من الأنا فيهو ده ... لكن أمي

الحكيم إجازتو باقيلها خمسة يوم ويجي الشفخانة وبقلعو ليك ..

وأمي تقول : أجنا الله يطرطشك أكتر من الإنت فيهو ده .. خمسة يوم إن شاء في

سجن كوبر .. كيفن إنتظر وأنا بالحالة دي . ولمن شفتها مصرة قلتله

خلاس بكرة من بدري نمش خرتوم الجن دي أجهزي حضري حالك .

ومن صباحاً دغش ألقالك المرة حضرت بقجته وجات صحتني وأتاريها الليل

كلو عدتو (مشاط) وتمسح وتدعك ( التقول موديها الدلالة أبيعه)

.. قلت ليها : أمرة مالك (بقيتي جديدة) كدي فرحانة بي مشيت

الخرطوم؟ عارفك ماشة عشان تجي تتفنجري على نسوان الودع

.. أها المرة الطيبة قعدت تضحك . وتقول لي من الله

خلقك ممسوخ ومشاتر .. أها مشينا الخرتوم وعلول

ما وصلنا بدت الأسئلة .. ركبنا البص السياحي

قالت لي : الأشتر ده مو البنطون

قلت ليها : بنطون يمش في الزلط .. ليه (دكتور تروته) ؟

لفينا صينية القندول قال لي : أجنا ده مو المنتزه البقولوا؟

وفي الشارع .. أجنا البنات ديل مالن منطلقات في

الشوارع بلبسن كده ما بخافن من الهواء .. والوليدات

ديل مالن محزقين وشعيراتن زي الديوك كدي وسجمي

الرجال الكبار كمان يلبسوا البنطلون جنس صيبة .. ووب

علي شوف المرة ديك سايقة العربية (قهرته بالقاهر والنبي الطاهر)

الشديدة اللضيضة .. والشكية لي الله لا بقرة لا غنماية لاحمار

الناس ديل بزرعو وين نان .. غايتو ده أخر الزمن زاتو

دخلنا المستشفى ودفعنا (التظكرة في الباب)

قالت لي : الأشتر كدي انتعالج أول بعدين نخش السيلما
.
علول ما دخلنا نلقا ليك الممرضة الأربعة في أربعة

(محل ما تمد إيدك تحمد سيدك) ولابسة الأبيض

والطاقية الصغيرونة في الرويس الكبير ووتقدل في الممر

أمي قالت : (واحلات الركشة ونضافته) أريتها ركشة وليداتي بعد الحال

قلت له : أيمة دعوتك إن شاء تلحقني وتفزعني .. لكن دي مو ركشة .

دخلنا علي الحكيم ليل السنون وبدأ يسأل في الولية : مالك يا حاجة ؟

قالت لو : الداهي المقنب في جهة نتاق العوضة لمن

أرقد .. متاورني بالحيل .. ومشتحف رويحتي .. وينتح في

لهاتي .. وينبح نبيح الكلب العضة الأشتر ولدي والليل

كلو عيني ما إتلاقن ولا باختن النوم ولا غمدته ومتولمه

منو شديد خلاس لا لقمة قادرة أكله ولا قهوة قادرة أبلعه

ومخليني متقريفة للقهوة .. سويتلو الجردقة ونشفتلو

القميل وكبيتلو الصعوط .. وده كلو ما نفع يا ود أمي .

. دحين خسمتك بالنبي شوف لي ليهو طريقة ( وأنا ما بعرف الشكية).

الدكتور : فتح خشمو وطبعاً نص الكلام ما فهمو .

. وعمل فاهم قاليها أفتحي خشمك .. ودي كان أول

مرة أشوف خشمها من جوه .. أتاري لاحق برج التجارة

. متهاير تب وكل واحد مافي محلو (حكمة الله بتبادلن المراكز)

.. الحكيم قال ليها : إلا تقلعيهم كلهم ونسوي طقم تاني ..وأدانا موعد للقليع .

أها في طريق الرجعة : أمي قالت لي : أجنا الحكيم

ده مو نجيض وأظنو ماعارف شي كيفن أقلع سنوني

العقدن معاي العمر كلو وأسوي لي سنون زول تاني يمكن ميت

.. يمكن مستسمات .. يمكن سنون كافر (ومعلمن على الخمرة) .

. أها أقعد أسكر وأشرب الخمرة وأعصي ربي بعد العمر ده وكمان

يمكن ما يعرفن ينضمن جنس نضمينا ده .. ويمكن ما بنفع معاهن

أكلنا وقهوتنا المرة دي .. وهو أكان نجيض ما يديني دواء ساي ويخليهن .

قلت ليها : كلام القلتيهو ده كلو أنا معاك فيهو وفعلاً سنون

الزول التاني ده يمكن ما تنفع معاك لكن يا أمي

أنا خشمك الشوفتو بي عيني ده ما دايرلو حكيم

قال لي : أها المطرطش يعني بدورلو شنو ؟

قلت لها : داير ليهو مقاول عديل

كلب المغترب - الشاعر عبد المجيد عبد الغني

يا ريتني ما كنت مغترب

كان من صفحة لي صفحة أنقلب

أنوم لي الضحى لا ضريبة ولا كفيلا كلب

أفطر بي مزاج كبد وكلاوي وشغاف قلب

أنتكي لي الجبنة بكرية وتاني بركة وتلتاوي وشية ذاتو ما بنحسب

مسكين الفنجان قعد يناهد تعب

وأقوم أنا أمسك الدرب

أحوم الحلة شرق وغرب

تلاقيك الناس شايلة المحنة وطيبة القلب

ديك بت أهنا تحت غنمايتا الولدت تحلب

تعزمك لي اللبى وتحلف السخيلة بي اسم وليدك تنكتب

وداك الشيخ ود مهدية تحت راكوبته ينبح مع السعية

الجدادة كر يا مدعية

والبهيمة تك جاتك رزية

وبرغم مشاكلو العصية

بأحسن منها يرد التحية

ويدس في جيبك قبضة بركاوية

تمرق منو فوق الخلوة

جضيض الشفع وريحة القلوة

واحدا سايقلو ترتار

وواحدا متنبل محتار

وبنية تقش وسط الدار

بعد ما اقرب المنظار

أتنحنح وأقول يا ستار

بي سرعة تلفح البوبار

وترد بي انكسار

مسكينة زوجوها لي مغترب

هو في الشرق وهي في الغرب

وأخوه فوق حقو يجقلب

مرات يتلفن ومراتا يكتب

يوما لي الدولارات يحسب

ويوما في السوق يجلب

قال دايرلو فريزيان تحلب

ولي الحراسة نجيبلنا كلب

مرت سنة وقربت جية المغترب

وأخونا راح ليه الدرب

كمل القسمة وجداول الضرب

وكان الناتج اسافر الغرب

حزم الشنطة ولي القطر ركب

صبحيتو وصل المغترب

وقدام الحلة لقى قبر الكلب

عليه لافتة مكتوب فيها بي دم القلب

ترقد هنا بقية أملاك مغترب

الشاعر محمود عوض الكريم

كل ما أقبّل وأعاين

ألقى عينيك جات في mine

حاجة very good

حاجة fine

يا suger مصنع كنانة

يا flour مالية البطانة

إنتِ fantastic banana

إنتِ my eyes رتينة

إنتِ where is مابتجينا

إنتِ عينيك فيها light

إنتِ شعرك dark night

إنتِ طبعك كولو right

إنتِ my heart إنتِ نورو

إنتِ my love البدورو

عايز أشوفك more tomorow

عايز أشوفك more tomorow

حظي التعيس الهردبيس

الناس يرك فوقها الحمام

وانا فوقي قد برك الكديس

*******************

يوم انقشرت وقلت اكسح

بيت عرس يوم الخميس

طوالي فو تتفرتق الحفلة

وتموت ام العريس

*******************

حظي التعيس للترزي

امشي عشان اقيس

كل القماشات قاعدةface

الا قماشي يدخل عليهو وياكلو تيس

*******************

حظي الكعب

من زمن شافع صغير بلعب

اشيل النبلة اقلبا لب

وتسمع رب

ومن الجو يقع لي ضب

******************

حظي الدلم ما عندو دم

في الكبدة يطلع لي عضم

********************

حظي الحشر النحس جواي منتشر

في البسكويت القي القشر

كرعي جوه البنطلون ما بتنحشر

سنارتي في البحر الكبير تقبض جقر

********************

حظي الكعب حظي اللعين

سايقني واصل بي وين

الناس نضاف ومروقين

وانا بي هناك مليان سكن وعجاج وطين

*********************

الناس تكيس ماجدة رنده وماجدولين

وانا بي هناك قايدني ناس بت الحسين

*********************

حظي التعيس والدبرسة

اي واحدة اكيسا

يجي ود لزينة يعرسا

شقيان مهلوس بالزواج
متمنى بس بت الحلال
راسى انصلع ..ضهرى انحنى
اصبحت زى قلم الدلال
اتكرفس الوش وانكمش
وقعو السنون ..وقوامى مال
كل السبب عدم القرش
سجم الجنا الماعندو مال
انا اصلى ما سجم الرماد
وانا اصلى شوم ما عرفت فال
اتعززو البنوت على
واتقندفن ..فعلن فعال
البايره ديك ما بترضى بى
شبه القرد عملت غزال
والشينه صاره وجيهها لى
عملت كمان ملكة جمال
كل السبب عدم القرش
سجم الجنا الماعندو مال
امشى لبت العم تقول
عما يكبسك ..شوف ليك خال
امشى لبت الخال تقول
خلخل ضروسك سوس عضال
وامشى لبت الجار تقول
جر يا كلب سعران وضال
كل السبب عدم القرش
سجم الجنا الماعندو مال
كل ما اقول اخطب لى بت
الناس تفك فوقى الجهال
هاك يا لبع ..هاك يا خبط
ناس بالعصا وناس بالنبال
وتقوم على ام العروس
تلبعنى بى فردة نعال
وتقول لى روح يا عرّه غور
اختانا يا خيبة الرجال
وين ما امش زين انهرش
قط للعرس مافيش مجال
كل السبب عدم القرش
سجم الجنا الماعندو مال

رووعة جدا ودالعقيدة ومحمد هاشم مبدعين والله ما تبخوا علينا كنتم وين ؟