طرائف ابو داؤود وعوض دكام

طرائف ابو داؤود وعوض دكام
اللهم ارحمهما رحمة واسعة واغفر لهما
------------------------------------------------------
عوض دكام يوم جاتو واحدة من بنات اهله زعلانة وبتحكي ليه:
قالت ليه كنت راكبة عربيه مع واحد شغال فى الحكومة
نظام فضل ظهر وكدا اسموا يونس النباح الذى اشتهر بتقديم التعليق السياسى
بعد نشرة ثلاثة فى الاذاعة المهم الراجل دا سالنى رايك شنو فى حكومتنا
قلتو ليها سجم ورماد نبزنى ونزلنى من عربيتو،
فرد عليها عوض دكام ليطيب خاطرها هو نبز خادم الحرمين الشريفين خلي انتي يا خادم العباسية ..!!
------------------------------------------------------
قالو ابو داؤود مشى بيت فرح على اساس احياء حفل ،
لكنه وجد الفنان القدير المرحوم / خضر بشير واقف على المسرح ويغنى
ومعروف المطرب خضر بشير انه ينفعل مع الغناء
عندما وصل ابو داؤود ووجد هذا المنظر سحب ليهو كرسى وقعد
يتفرج وهو زعلان جدا ، وكان امامه طفل واقف يشاهد فى المطرب خضر بشير
قام ابو داؤود قاليهو ابعد كدة ولا كدة يا ولد ، اوعى تطير فيك شلوفة ولا اصبع يفلقك !
------------------------------------------------------
دكام كان مدير مستشفى الاسنان وشالوه من المنصب .. وجابو مدير جديد
واحد من اصحابو لقاهو بيتحاوم بى بره .. قال ليهو مالك يادكام حايم بى بره ...رد دكام .. ياخوى ماضرتى جوه مابقدر ادخل ( بيقصد المدير الجديد) ..
------------------------------------------------------
قالوا يوم ابو داؤود كان شغال حفلة وانتهت متأخرة ناس العرس اصروا عليهم يبيتوا في بيت العرس وفي الصباح ابو داؤود بتسوك في الماسورة جات ماشة بي جنبه مرة كبيرة في السن قالت ليهو إمبارح العب ساهر بيكم يا ولدى.. قال ليها والله ياحاجة العتب على النظر !!
------------------------------------------------------
عوض دكام قال فى واحد
مشى يقلع ضرسو فى مصر
الدكاترة قالوا ليه يا زول
ما عندكم دكاترة اسنان فى السودان
السودانى قال ليه فى دكاترة
بس الحكومة مانعانا نفتح خشمنا !!
------------------------------------------------------
ابوداؤد كان بغنى فى حفلة والصف الاول كان
كلو جكس حجم عائلي كلو واحدة اسمن من التانية
وبعد الاغنية الاولى قام الجماعة كوركو ليهو
بالله يا استاذ فريع البان ...قام عاين ليهم وعاين
للصف الاول...وقال ليهم فريع البان كيف مع
شجر التبلدى بتاعكم دة !
------------------------------------------------------
عوض دكام قال جاتو واحدة
جميلة جميلة جميلة
قدر ما فتشها لا سوسة ولا صفار
ولا الم ولا التهاب لثة
قال ليها انتى ما عندك حاجة
مشكلتك شنو؟؟؟
قالت ليه عارفة بس جيتك تعمل لى فلجة !!
------------------------------------------------------
قالوا ابوداؤود كان شغال حفلة وبعد ما غني الفاصل الاول الجماعة نادوه للعشا فعلي حسب عادته قال عاوز يتعشي مع الجمهور
قام قعد في طربيزة ومعاه مجموعة
جات الصينية الاولي عاين فيها لقاها فقهة (رقبة)..عاين للصينية التانية برضو لقي الضلع فقهة (الجماعة كانوا ضابحين خرفان كمية)التلتة برضو كدا
قام نادي العريس وقال ليهو اسمع يا خوي انتو ضابحين زرافة ولا شنو؟؟
------------------------------------------------------
مره عوض دكام كان واقف في محطه البنزين
ومعهو زوجتو في العربيه الكل كان يعاين ومزهول بالجمال واللون الابيض اللامع دا
عوض دكام نزل من عربيتو وقال ليهم ياانتو ماشفتو ليكم سندوتش جبنة بالزيتون قبل كدا!!
------------------------------------------------------
عوض دكام قبضوه ناس الدورية
وما بعرفوه
يا زول شايل شنو فى الضهرية؟؟؟
قال ليهم جنا حرام
يا زول نحن ما بنهظر
فتحو الضهرية لقو بيض
قالوا ليه انت بتلعب علينا؟؟؟
شايل جنا جداد تقول جنا حرام ؟
قال ليهم وده ما جنا حرام ؟
شفتو ليكم ديك عقد ليه على جدادة؟؟
------------------------------------------------------
ابوداود كان فى رحلة مره فى بورتسودان، بعدين الجماعة طبعا ضابحين ومهيصين وبعد الضبيحة قاموا جابو المرارة والشيه وبدو ياكلو، بعدين من ضمن الأكل كانوا عاملين ليهم خروف كامل معلق فى شواية والنار مولعه تحته والدخان ضارب
قالو ليهو تعال يا عبد العزيز شوف المراره دى
قال لا ما عايز، انا مستنى الكمينة ديك تطلع!
------------------------------------------------------
قال ليك عوض دكام كان فى فراش بكا
وكان يوم رفع الفراش وعوض دكام مشى عشان يدفع فى الكشف
واحد من اصحابو قال ليهو انت يا عوض مفروض تدفع بالدولار
عوض دكام قال ليهو لية فارشين فى السوق الحر!!
------------------------------------------------------
في عيادته في بحري وهو يعالج احد المرضى
..وعنده تلفزيون في داخل العيادة وبدأت مباراة هلال مريخ
..ومعروف عنه انه لازم يحضرها في الاستاد
...خرج الى الصالة ووجد مجموعة كبيرة من المراجعين والمرضى
...واتلفت الى التلفزيون ورأى ان المباراة ستبدأ ...فالتفت الى المرضى قائلا
انتو عاوزين الجد ولا ابن عمو؟
انا من ما فتحت العيادة دي ما شفت واحد كتلو ضرس
امشو وتعالو بكره
وما في زول بيكتلو ضرس !!
------------------------------------------------------
عوض دكام في مرة سايق العربية بتاعتو
وقف في اشارة
اتلفت يمينو لقى
حامد بريمة
حارس المريخ السابق
سايق لفت باك حمراء جديدة
ضرب ليهو العربية بيده
وقال ليهو :
ياعب لو ما كورتك دي
والطب بتاعي ده
كان مكاوينا تتطاقش
------------------------------------------------------
ومن الطرائف التى يحكيها عبد العزيز محمد داؤود عن زوجته
الفاضلة فوزية محمد حسين انها ابان الفترة الاولى من زواجهما..
ظلت تسال عبد العزيز كحال اى عروسة جديده تود ان تعبر عن حرصها على زوجها..
تساله:عبد العزيز ماشى وين ؟؟
يقول: الاذاعة…
هى: وحتجى متين انشاء الله ؟؟؟
هو :بعد ساعتين..
و فى وقت اخر:عبد العزيز ماشى وين؟..
هو عندنا حفلة عرس فى امدرمان...
هى :وبتجى متين انشاء الله ؟؟؟
هو: بعد اربعة ساعات
..وهكذا من يوم لاخر..وفجاة بادرها يوما...تعالى انتى يا فوزية انا مؤجر منك عجلة!!!!!
------------------------------------------------------
كان فى فنان اعمى وعامل عملية بواسير
قام ابوداود مشى ليه زيارة فى المستشفى
وبعد السلامات والتهانى بالسلامة
قعد يتونس مع باقى الناس الجايين للزيارة
قام فجاة كده ابو داوود سكت مسافة طويلة وباقى الناس بقوا يتونسوا
قام الراجل العيان سمع صوت الناس بس وقايل ابوداوود مشى ولا طلع من الاوضة
قام قال ليهم انتوا العب ده مشى ولا شنو
ابو داوود رد ليه
انت علشان حركاتك دى الله قاطع منك موية ونور .
------------------------------------------------------
في لقاء في التلفزيون مع ابو داؤود و فى فقره الاسئله الخفيفة
سأل مقدم البرنامج الفنان عبد العزيز داؤود عن اسامي بعض المشاهير
يعني لو ما كانو وصلو لي الوصلو ليهوالان كان حيطلعوا شنو .
قام المقدم سالوا عن محمد الامين , ابو داود قال ليهو شايل كورتو و قاعد جنب الجامع الكبير
------------------------------------------------------
أبو داؤود كان سايق عربيتو أشرت ليهو واحدة
متحنكشة دايرة تملح
وقف ليها وقام شغل شريط خاص بيهو أغنية نعيم
الدنيا وهي طبعاً
ما عارفة انها راكبة مع أبو داؤود في نص الأغنية سألها
بتعرفي الفنان
دا قالت ليهو فنان شنو دا حمار قال ليها قلت شنو قالت
ليهو قلت ليك
دا ما فنان دا عبارة عن حمار ياي ... أبو داؤود وقف العربية
ونزل مشى على الباب الراكبة جنبو فتحو
وقل ليها تنزلي والا أرفسك !!
------------------------------------------------------
قالوا يوم كدة جاء واحد صاحب المرحوم أبوداؤؤد لي أبو داؤود في البيت ..
قال ليهو في فنان شاب بيقلدك في الحفلات والليلة هو عندو حفلة وأنا دايرك تمشي معاي
وتديني رايك في الولد دا ..
أبو داؤود وافق ومشى لي بيت الحفلة وقعد ورا عشان ما في زول يعرفو وفي الوكت داك كان
الفنان بيغني كيف الحياة غير ليمك لكن بالطريقة دي ..
كيف الحياة غير نيمك
أبو دا ؤود قدر مايرخي أضانو يسمع الولد بغني غير نيمك (ما ليمك) ..!! لمن الفاصل إنتهى أبو داؤؤد حاول يتأكد نادا الولد وسألوا الغنية بتقول شنو ؟؟!!
الولد أصر قال ليهو كيف الحياة غير نيمك ..
أبو داؤود زعل وقام تمى البيت للولد :
ومن بعدك أصبح حظي زي لون برسيمك
------------------------------------------------------
ابو داؤؤد شغال عن واحد مديح تقيل والزول متلحهو زلابية وشاي سادة الليل كلو .
المهم في الاخر قام طلب منو مدحة اسد الله البضرع ..وطبعا هو زعلان شديد منو . قام رد عليهو يا زول انت ماك نصيح ولا شنو كمان الليلة اسد الله يضرع ليهو فوق زلابية ّ! ....
------------------------------------------------------
أبوداؤود مسافر قطر - قابله صاحبه في المطار- قال ليه والله صدفة عجيبة- الحاجة ماشا تولد بتها ولا يهمك ساعدها لداخل الطائرةوأبو النسب بيستقبلك في المطار- دخل معاها والشنط ثقيلة هدت حيله وفي التفتيش طلعت مليئة حطب شي"شاف" وشي ما "شاف" وطلح وصندل وغيرها...وزهج من الحاجة والتعتيل ... وصل المطار خرج المصيبة أبو النسب تأخر عليه ... أصحاب أبو داؤود جو يأخذوه ... سلموا عليه ... وواحد عاين كده لقى الحاجة بجواره ...قال ليه: ده شنو يا أبو داؤود ... رد عليه ... دي .. دي ... دي ما حمالة الحطب !
------------------------------------------------------
قالوا أبو داود كان مشارك في حفل رسمي أيام النميري ، ومعاه عدد من الفنانين ، قام أبو داود قال لأحمد المصطفى كنقيب للفنانين ، يا أخي ما تكلم لينا الرئيس ده يطلّع لينا وردي من السجن . قام أحمد المصطفى قاليهو : أمشي انت اقعد جنبو وشوية شوية كلمو .. قام أبوداود جا قريب من النميري ، والنميري طلب منه أن يجلس علي الكرسي الجنبو وطلب منه أن يحكي له نكتة ، فحكا أبوداود وضحك النميري ، وحكى له أكثر من نكتة وأضحكه . فقال أبو داوود للنميري : ياريس ما تشوف لينا موضوع وردي ده . قام النميري رد بانفعال : وردي مالو؟
فقال أبوداوود : ما تعدموه تريحونا منّو يا ريس .
فضحك النميري ، وأمر بإطلاق سراح وردي ...
------------------------------------------------------
واحدة في حياتها ما شافت
أبو داؤود ... وقامت كده
مشت حفلة وقالوا ليها البيغني
ده أبو داؤود ...
بعد الفاصل مشت ليهو وقالت :
-هي سجمي رسمي يا أبو داؤود ما كنت
قايلاك أسود كده !!!
رد عليها :
-كنت قايلاني بطاطس !!!!!!
------------------------------------------------------
يحكى ان د. عوض دكام - وكان راجل نضيف وبحب النضافة- كان مشاى مشوار مهم وكان قاشر فل سوت قامت صبت مطرة ساعتين واول ما المطرة وقفت طلع الشارع وعربيتو كانت بعيدة شوية من الباب والراجل خايف على جزمتو من الطين قام فجأة شاف ليهم اتنين خايجين الموية وماشين فى الشارع قام ناداهم (هوى يا شباب دقيقة)
قالو ليهو أيوه قال ليهم انتو جايين من وين ؟ قالو ليهو والله نحن شغالين طُلب قريب من هنا
قال ليهم طيب ياخى انا بس عايزكم تشيلونى من هنا وتركبونى العربية ديك وبدى كل واحد فيكم عشرة ألف
قالو ليهو جدا، المهم شالوه وختوهو فى العربية
قال ليهم: قلتو لى شغالين طُلب بهنا ، وبتاخدو كم فى اليوم ؟ قالو ليهو 15000 فى اليوم
قال ليهم طيب أنا حأدى كل واحد فيكم عشرين بس لو شكشكت تجو جارين. Smile

------------------------------------------------------
في واحدة من المرات قابل أبو داوود الفنان زيدان إبراهيم وسألو وقال ليهو :
يا أبو الزيك عارف أغنية الجدادة المفضلة شنو ؟؟؟
زيدان قال ليهو :
لا أبداً ..
أبو داوود قال ليهو :
أغنية في الليلة ديك !!!
------------------------------------------------------
المرحوم الدكتور عوض دكام ايضا ومما يحكى عنه انه فى ذات مره
كان فى عيادته فدخلت عليه امراه عجوز فاستغربت من هيأته
وقالت له (ياهو انت عوض دكام؟) فرد بالايجاب,
فقالت: كنت قايلاك سمين وحلبي.
فاجاب: ولقيتيني ازييييرق وعفين!!!
------------------------------------------------------
أبوداؤود ومعاهو الكوميدى السميح ماشين مبسوطين ويغنوا فى شارع النيل
ودا كان زمن مايو ، فقاموا ناس الامن قبضوهم وجابوهم للقاضى ، يامولانا ديل قبضناهم
بنبزوا فى مايو ، فزعل السميح وقال والله نحن كنا بنغنى ، فالقاضى سألو كنت بتغنوا
فى شنو سمعونى ؟
فغنوا مع بعض ( جيتنا وفيك ملامحنا )
القاضى قال وطيب !! دا ما نبذ عديــــــل كدا أجلدوهم يلا .
------------------------------------------------------
الفنان الدكتور المرحوم عوض دكام معروف بي الحكاوي الطريفة وإن كانت علي نفسه ..
حكي في واحدة من المرات إنو جاتو بت حنكوشة تقلع ضرسها وكانت متجرسة شديد وخايفة
قام هو بقا يهدئ فيها وفي أثناء ذلك قلع ليها الضرس بدون ما تشعر وقال ليها قومي خلاص
البت إتفاجأت وما صدقت إنو قلع ليها الضرس ..
الدكتور المرحوم عوض دكام قال ليها:
عليك الله ما عب فنان ؟؟؟؟؟
البت إتحسست وسكتت وما ردت !!
كرر ليها السؤال وقال ليها :
في ذمتك ما عب فنان ؟؟؟؟
تاني البت عملت فيها ما سامعة ..
كرر ليها السؤال قال ليها :
النبي فوقك ما عب فنان ؟؟؟
قامت البت قالت ليهو :
آآآي فنان ...
قال ليها :
يعني عب مش؟
------------------------------------------------------
واحد بيحب غناء ابوداؤد بشكل مخيف .. في الحفلات بيقيف منتشي ويشرط جلابيتو من فوق لي تحت ..
ابوداؤد قال ليهو تعرف يا أخونا انا حا افصل ليك جلابية بي سوستة عشان ترتاح من الشرّيط دا!!!
------------------------------------------------------
ابوداود مشي يشتري خروف...عجبو خروف (كموش) كل ما يجي يقبضو .. الخروف يجري ..
قال ليهم الخروف .. عرف انو انا ماكل عمو لا خالو قبل كده....
------------------------------------------------------
...مره في السوق..جاء شافع من الشماسه جاري جنب ابوداود...
ابوداود قال ده وقع مني و لا شنو
------------------------------------------------------
مره أبو داؤود والفنان البعيو عندهم حفلة فى أبوهشيم ، وعندالمغارب طلعوا يتمشوا وهم ماسكين بعض فشافهم شافع من الرباطاب من بعيد ، وبعد فتره الجماعة بسألو وين أبوداؤود قام الشافع قال ليهم والله شفتو شايل ليهو ابريق ومشا هناك .
------------------------------------------------------
مره أبوداؤود فى زياره لحموده (حلاق الجامعة ) ، جات امرأة كبيرة دخلت وبتسأل فقام حمودة سلًم عليها سلام شديد كانه يعرفها ، أبوداؤود سألو أنت بتعرف المره دى ؟؟ قال ليهو أيوه دي ما حرم الجامعة .

-------------- منقول من سودانيزاونلاين--------------

سيف الدين يا رائع و الله قطعت مصارينا بالضحك ....
و نسأل الله لهم الرحمة و المغفرة بقدر الإبتسامة التي زرعوها في وجوه الشعب السوداني ...

نسال الله لهم المغفره

ههههههههههه مشكوووور المبدع سيف الدين ونقـــــــــــــــــــــــــــــــــول
رحم الله ابوداوؤد وعوض دكام ولم يتركوا غير التراث الضخم وهذه السيره العطره ولا تزال نكاتهم الجميله
تثير البهجه والفرفشه فى نفوس كل السودانيين" ولك التحيه

د نكتها من وين النكات الحلوة دي .. والله رهيبة جداً :
طيب خد دي :
قالوا يوم ابو داؤود ومعاهو البلابل كانوا شغالين حفلة وانتهت متأخرة ناس العرس اصروا عليهم يبيتوا في بيت العرس وأدوهم سريرين بس في حوش البيت ، أبو داؤود رقد في سرير والبلابل الثلاثة إدفسوا في السرير التاني ، أبو داؤود راقد في السرير زي تمساح البحر والهواء ضارب عنقرتو فقام قال ليهم : يا بنات لو مضايقين واحدة تجي ترقد جنبي .. البلابل قالوا ليهو لا يا أبو داؤود نحن مرتاحين وما متضايقين .. فقام سألهم تاني يا بنات لو مضايقين واحدة تجي ترقد جنبي .. البلابل قالوا ليهو لا يا أبو داؤود نحن مرتاحين وما متضايقين .. فقام قال ليهم (خلاص أنا لو إضايقت بجيكم )

هههههههههههههه
الله يرحمهم ويغفر لهم
جيل لن يتكرر
كانوا مبدعين في مجالاتهم
وقلوبهم صافية كالحليب
--------
المرحوم حسن خليفة العطبراوي رغم أنه كان صديق لأبوداؤود , إلا أننا لم نسمع عنه طرائف كثيرة مثل ابو داؤود . اللي عنده حاجة يقول لينا

عوض دكام سايق عربيتو , في الطريق مرو بجنبو نسوان واحدة قالت للتانيه ( بالله شوفي العب دا راكب عربية ) سمعها عوض دكام و مد راسو من شباك العربية و بإبتسامة قالها ( و كمان دكتور ) ...

رحمهم الله جميعا وادخلهم فسيح جناته

رحمهم الله جميعا وادخلهم فسيح جناته

الجزء الثاني :

مرة عوض دكام جاء داخل العيادة بتاعته لقى في كشف المرضى اسم فتحي فرج الله لاعب المريخ زمان ... وبعدين ما كان شافو قبل كدا طبعا فتحي فرج الله عيونو في نص راسو ) .المهم دكام عاوز يشوفو قام ناداهو أول واحد) لما دخل عليه ، دكام اتخلع بي شناته ، كان متخيله نجم وجيه قال ليهو انت فتحي؟ قال ليهو أيوة أنا فتحي.. دكام رد بسرعة طيب أمال فرج الله يكون كيف ؟؟؟

*****************************

عوض دكام بقدم فى قعدة فيها على ابراهيم و زيدان ابراهيم اول ما بدأ على ابراهيم غنى تمساح اب كبلو الضارب الليه ،،، عوض دكام نطى لى طوالى قال ليهو التمساح الابلعك حسى دا وكت تماسيح زيدان عليك الله وسط الزهور متصور

*****************************

في واحد مجنن أبو داؤود كل ما يشوفو في حفلة أو قعدة يقول ليهو يا أبو داؤود عليك الله زهرة الروض .. الأغنية دي بترجعني عشرين سنة لي ورا.. أبو داؤود زهج من الزول ده يوم قال ليهو ياخي زهجتني ، أسمع إنت عمرك كم سنة ؟؟ أخونا قال أربعين سنة أبوداؤود قال ليهو خلاص أنا بغنيها ليك مرتين!!! عشان ترجع في بطن أمك ونرتاح منك ياخي

*****************************

قالوا عوض دكام لمن كان فى الدفاع الشعبى جاكين فى الكلاكله وعطشوا ... مروا بى شفع كده قام عوض دكام قال لى شافع جيب لينا جك مويه ... الشافع جاب المويه وسال دكام انت شغال ويني ياهناى ؟

دكام قال ليهو: انا دكتور

الشافع عاين لى صاحبو وقال ليهو ….. العب عايز يدقسنا يافرده ياخوى اشرب مويتك دى وادينا جكنا.. قال دكتور قال !!

» من طرائف الاعراب
» طرائف الأعمش
» من طرائف الجاحظ
» هل صدق ( حمد الريح ) حين قال :-.............؟؟
» من طرائف حوادث الكلاب الشرسة بالخرطوم