مشغول لكن مابجافى

من العيوب التى نقع فيها عدم التواصل والزيارات للاهل والاحباب والاصدقاء بصوره منتظمة ولمن يجى اللوم ويسالوك وين انت طولت مننا بسرعة نجاوب والله كنت مشغول او مشاغل الحياة او ظروف الدنيا طيب مالو لو كل زول رغم مشغولياتو وظروفوا الصعبة ماينسلى يروز الناس ونود الاحباب والاهل والمرضى علشان ما تبقى المشغولية جفا ويقولوا فلانه دى زول جافى ومابيسال علينا ولو من الشغل وانت تعبان من معانات العمل وزحمة الطريق نغشى حبوبة ويمة او رقية العيانة والزيارة فى المستشفى زمنة محدود ونطلع منهم سريع ونقول ليهم المرة الجاية اكون فضيت شوية واقعد اقيل معاكم تصدقو بنكون جبرنا خاطرهم ويدعو لينا انشاء الله ربنا يوفقكم ويوسع رزقكم ويعدلة عليكم محل ماتقبلو اها كدة ياجماعة مارضينا على الجماعة ديل وكمان لقينا لينا دعوة كاربة وقدروا ظروفنا ومشغولياتنا وعرفوا اننا مشغولين لكن مامجافيين

بنت النيل , خذيها مني انا الشيخ فرح ود سفسوف :
حا يجي يوم , يكون فيهو :
* رنتين بالموبايل معناها مبروك المولودة , تتربى في عزكم
* اربعة رنات بالموبايل معناها مبروك المولود , يتربى في عزكم
وفقا للمبدأ الشرعي .. للذكر مثل حظ الانثيين

يااخوى سيف اوعك من الزمن دة ولو بقت المجاملات بالموبال دة مش جفا دة يكون الجفاف كلو وربك كريم علينا

الجفا حاصل اختي بت النيل اسة بقت موبايلات وكلمتين تطيب خاطر كدا وخلاص
الاشويتين كدا وكلام سيف بيتحقق البيعيش اكتر يشوف اكتر
نسال الله سبحانه وتعالي ان يقدرنا علي مواصلة الارحام والاحباب

اشكرك ياأخى الفاضل محمد جمعة على مرورك والتعليق

الاخت الكريمه جزاكى الله كل خير بتذكير بمواصله الارحام
لقد وردت فيها احاديث كثيره(من كان يؤمن بالله ورسوله فليصل رحمه )(من احب ان يبسط له فى رزقه وينسأ له فى اثره فليصل رحمه)
عن عبد الرحمن بن عوف رضى الله عنه قتال:سمعت رسول الله _ صلى الله عليه وسلم يقولقال الله تبارك وتعالى : انا الله وانا الرحمن خلقت الرحم وشققت لها من اسمى فمن وصلها وصلته,ومن قطعها بتته)
وقال تعالى فى محكم تنزيله فى سوره محمد 22-23(فهل عسيتم ان توليتم ان تفسدوا فى الارض وتقطعوا ارحامكم اؤلئك الذين لعنهم الله فاصمهم واعمى ابصارهم)
وصله الرحم ان تصل من قطعك ولا تكن بالمكافئ اى تصل من وصلك

اشكرك اخى الكريم عمادالدين على مروك وتعليقك وجزاك الله خيرا