حنة العريس

موضوع: حنة العريس الأربعاء أبريل 14, 2010 10:22 pm

حنة العريس كانت زمان ليها شنة ورنة ويتلموا الاهل وناس الحلة واصحابو وهاك ياغنى ورقيص وكل الشباب يتحنن مع العريس وديك يا الحنة الماخمج معجونى فى صحن الباشرى الكبير ويرحمن كل القاعرين ومنتظرين الدور علشان يحننو ايديهم الاتنين كمان ودة برنامج كان جميل جدا وله تقوس سودانية بحتة ولكن للاسف بدات تنقرض هذة الاشياء تدريجينا لان معظم الشباب بقى يرفض ان يضع الحنة والنسوان الكبار من اهلة يصرو علية ياولدى دى السنة ولازم تتحنن علشان حياتك تبقى كلها محنة وبعد ما يطلع روحم يقوم يخط حنة بسيطة فى طرف اصبعو الصغير والموضوع ينتهى يعنى بس ترضية والجماعة المنتظرين يتحننو معاة ارحت عليهم
وبالعديل والزين

[ندعوك للتسجيل في المنتدى أو التعريف بنفسك لمعاينة هذا الرابط]

صينية الحنة ومبروك للعريس

[ندعوك للتسجيل في المنتدى أو التعريف بنفسك لمعاينة هذا الرابط]

موضوع: رد: حنة العريس الخميس أبريل 15, 2010 12:51 am

[ندعوك للتسجيل في المنتدى أو التعريف بنفسك لمعاينة هذه الصورة]

اهم حاجة زمان كانت في حنة العريس الكشف الكنجالات
يعني كشف الحنة كان بيسدد الديون ويكمل العرس والحنة ماكانت مكلفة
تجيب ليك تيس او خريّف كدا عشاء الضيوف الجاين من بعيد والفنانين
وباقي ناس الحلة الحفلة بس تقضيهم اهم حاجة عندهم الحفلة والفنان كان بيجي مجان
ممكن يكون صحب اخوك او صاحب ود الجيران واحتمال يكون ود الحلة

اما حنة اسة بقت اول حاجة من صينيتها تقطع قلبك لانو بقو يختو فيها الفواكه واهم حاجة التفاح نظام المظاهر وكدا
زمان كان بيختو فيها الحلاوة والتمر والفول السوداني بقشرو والفشار

والعشاء شئ تاني والفنان بقي داير قروش والكشف بقي مافي نظام انا وضعي مرتاح
يعني بخسر كتير وكنجالات في الكشف مافي احسن شئ الغي حكاية الحنة دي نهائي

الله يديك العافية اختي بت النيل حركتي الشجون الكنا ناسنها وشيلتينا هم الحنة

موضوع: رد: حنة العريس الخميس أبريل 15, 2010 4:43 am

خلوها لانها بقت (محنة العريس) ..
العريس بقى يخاف منها لانها بند صرف اضافي ..
اقتراح :
ممكن يستخدموا (حبر الانتخابات) .. قالوا بيشبه الحنة .... ورخيص
وعملي : بس يطمس ايديه ورجليه في الحبر وخلاص لا حفلة حنة ولا يحزنون

موضوع: رد: حنة العريس الجمعة أبريل 16, 2010 3:35 am

لك التحية ياخى محمد جمعة واشكرك على مرورك وتعليقك ولكن ماتخاف يااخى الكشف لسى فى بس من تحت تحت يعنى نظام عائلى وكدة لو كنت مرتاح ونحنا ماعاوين الحاجات السودانية تندثر وطبعا حنة العريس تعتبر من التراث السودانى وتتزكر لمن الاهل يغنو يقولوا :
الخير بريدة حننو الليلة يوم جديدة حننو
شوفوا اصحابة جوهو حننو وقفو شرفوة وسيرة
شوف خالاتو جوهو حننو وقفوا جرتقو الليلة سيرة

[ندعوك للتسجيل في المنتدى أو التعريف بنفسك لمعاينة هذا الرابط]

موضوع: رد: حنة العريس الجمعة أبريل 16, 2010 7:29 am

اشكرك يا اخى منقو على المرور والرد وانت غيرت اسمك مع الانتخابات ولا شنو عموما نحنا ماعاوزين عاداتنا السودانية تروح مع الريح لانها جزء من تراثنا وثقافتنا وانت ما شفت الخواجة الجاء الى السودان علشان يتحنن ويعرس عرس سودانى

[ندعوك للتسجيل في المنتدى أو التعريف بنفسك لمعاينة هذا الرابط]

موضوع: رد: حنة العريس السبت أبريل 17, 2010 9:18 pm

حكاية الحنة للعرسان اصبحت شيء نادر جدا ويتخيل لي دخلت عليها العولمة والسرعة وأعتقد أنه بدأت صحوة في الشباب المقدمين على الزواج وأعتقد هذه العادة سوف تندثر تدريجيا .
أما بخصوص القدح او المساعدة فهده كانت سابقا أن يجلس احد الشباب وامامه دفتر لكي يسجل اسم كل من يدفع ، ولكن هذه ايضا بدأت تقل لكن عند النساء سواء ام العريس او العروس فيوجد كشف داخلي بدون تسجيل بمعنى تسليم المبلغ يدا بيد وفعلا هذه من التكاتف الإجتماعي وأتمنى ان تستمر ، وعقبال البكاري بالزواج ومشكورا اختنا بنت النيل على طرحك هذا الموضوع الثر.

موضوع: رد: حنة العريس الإثنين أبريل 19, 2010 3:18 am

اشكرك على مرورك وتعليقك

[ندعوك للتسجيل في المنتدى أو التعريف بنفسك لمعاينة هذا الرابط]
ده فطور العريس

[ندعوك للتسجيل في المنتدى أو التعريف بنفسك لمعاينة هذا الرابط]
شايفين العريس الحلو ده .. الظاهر عليهو من حلب أم درمان

الأخت بنت النيل :
ألاحظ أنك تتحرين وتنقبين في اختياراتك للمواضيع فدائماً ما تأتي لنا بمواضيع جداً جميلة تتعلق بموروثاتنا وعاداتنا وتقاليدنا وتتطرقين لهموم ومشاكل مدينتنا العريقة عطبرة .. دمتي ودام تألقك .
الحنة سواءً أكانت حنة العريس أو العروس فهي من أجمل العادات السودانية الأصيلة والجميلة التي تميز العرس
السوداني عن غيره.. وطبعاً تختلف فيه الطقوس حسب الموقع الجغرافي داخل السودان..
ما يحزنني صراحة يا بنت النيل أنه في الأونة الأخيرة تبدلت طقوس الحنة السودانية خاصة يوم حنة العروس حيث تحولت إلى طقوس دخيلة لا علاقة لها بعاداتنا وتقاليدنا.. فأخذت العروس ترتدي الزي الفرعوني أو الهندي أو الحبشي ، والظاهر شوية شوية ستندثر تلك الموروثات والعادات فهي إلى زوال .
والله يا جماعة نحن عايزين طقوسنا الجميلة في الأعراس ماتتغير وما تتحول حتى لا نقتل تراثنا وحضارتنا..!
يعني لازم زي هندي أو ساريه أو زي فرعوني أو حبشي .. يعني ما ممكن العروس ترتدي زي الهدندوة أو تغير بزي أهلنا في الغرب أو الجنوب مثلاً .. ونكون بذلك نوعّنا في طقوسنا ولم نغيرها 360 درجة والاستيراد من الخارج كما هو الحال الآن..!
تخريمة :
رأيكم شنو في تسريب بعض عاداتنا فيما يخص الحنة إلى خارج السودان .. وزي ما عارفين ستونة في مصر حننت الممثلين هنيدي والسقا وعملت ليهم الجرتق والحنة والضريرة وهلم جرا . هل ظاهرة سلبية أم إيجابية . في انتظار ردودكم

الهادي محمد عمر الشغيل كتب:: [ندعوك للتسجيل في المنتدى أو التعريف بنفسك لمعاينة هذا الرابط]
والله يا جماعة نحن عايزين طقوسنا الجميلة في الأعراس ماتتغير وما تتحول حتى لا نقتل تراثنا وحضارتنا..!
يعني لازم زي هندي أو ساريه أو زي فرعوني أو حبشي .. يعني ما ممكن العروس ترتدي زي الهدندوة أو تغير بزي أهلنا في الغرب أو الجنوب مثلاً .. ونكون بذلك نوعّنا في طقوسنا ولم نغيرها 360 درجة والاستيراد من الخارج كما هو الحال الآن..!

حب التميز في يوم متميز في الحياة يجعلهم يفعلون ذلك ..
ثم يأتي التقليد الاعمي : فلانة عملت فرعونية .. لازم اعمل زيها

الهادي محمد عمر الشغيل كتب:: تخريمة :
رأيكم شنو في تسريب بعض عاداتنا فيما يخص الحنة إلى خارج السودان .. وزي ما عارفين ستونة في مصر حننت الممثلين هنيدي والسقا وعملت ليهم الجرتق والحنة والضريرة وهلم جرا . هل ظاهرة سلبية أم إيجابية . في انتظار ردودكم

والله اعلم : ظاهرة ايجابية
(انا خلقناكم شعوبا وقبائل لتعارفوا)
وهذا نتاج للتعارف
وفي نفس الوقت إشادة بتميز الموروث الثقافي بحيث اعجب الآخر فقام بتقليده
افريقيا فيها الكثير من التنوع الساحر مما يفعل ما عجز عنه السياسيون

موضوع: رد: حنة العريس السبت أبريل 24, 2010 6:59 am

والله انا اوافق الراى يا اخ الهادى نحن نريد ان لا تندثر وتروح عاداتنا وتقاليدنا السودانية وتموت عبر الزمن
وكون ستونا تحنن الممثلين المصرين ما مشكلة مادام هنالك شعوب تعجب بالعادت والتقاليد السودانية وهذا اذا دل على شى انما يدل على ان عاداتنا اصيلة ولها قبول من مختلف الجنسيات وهذا ما نريد ان نحتفظ به ولكم التحية

» العريس وأهل العروس
» لو كنت العريس/العروس .. تقبل بالتنازل؟