هل صدق ( حمد الريح ) حين قال :-.............؟؟

[center]

ركبت حافلة ( الشعبية ) فإذا الجزء الأمامي من الحافلة والخاص بالسواق معزول تماما" بجزء كبير من الزجاج العازل السميك وبداخله من ناحية السواق به بعض الأجهزة ذات التقنية العالية والتي تستند معظمها علي التحكم والمراقبة للحافلة وركابها بواسطة ( الكابينة ) وبها أيضا" أجهزة عدة كذلك , لتسهيل كمية من الخدمات الجمة و الوفيرة للركاب سأوردها لاحقا" !!!!!!

فعند دخولي الباب وجدت أن الباب تحيط به كذلك أجهزة مراقبة لمدخل الركاب وترسل بدورها إشارة للسائق , وبها أيضا" أجهزة بعضها تعطي إشارة للراكب , فتعالوا لنري نوعية الأجهزة .

وجدت جهاز مسح ( سكانر ) لكل محتوياتك التي في شنطتك أو مابداخل ( قفتك ) وأنت داخل عبر الباب , فهو يظهرالمسح علي الشاشة للسائق , وكذلك يمسح و يظهر كل ماكان محمولا" بداخل حقيبتك ويكتشف ماكان خطيرا" علي ركاب الحافلة , فهناك جرس إنذار , فالجهاز ينتج إشارة معناها أنك تحمل محظورا" مما يفضحك وقد يحفز الركاب والسائق علي منعك من الركوب . بل أن الجرس هو الذي يفضحك , و ( براك بتلملم أطرافك وماحتركب ) خوفا" من نظرات الركاب شذرا" , فلذا فمن الضروري حتي يكون ركوبك آمنا" , أن يكون ركوبك من غير جرس وإنذار .

وبداخل الحافلة كذلك كان إستخدام الأجهزة التقنية المحمولة سهلا" , فالأجهزة بالحافلة بها تقوية لكل شبكات الإتصال , وبكل يسر أخرجت ( اللا بتوب ) وكنت في لمح البصر علي إتصال ( بالزوجة) أسألها إذا ماكانت تحتاج شئ غير اللي أحضرتهم لها , وطلبت منها أن ترسل طلباتها تقنيا" , خاصة" وأن معي جهاز ( طابعة ) لكل طلباتها , لكنها فاجأتني بأنها حددت موقعي !!! بل تعرف ما أحمل !!!!
كيف فعلت ذلك ؟؟؟؟؟؟!!!!!!!!!!!!
كيف حددت موقعي ؟؟؟؟؟ كيف عرفت ذلك ؟؟؟؟؟؟

فسالتها , فأزالت غموضي بأنها قامت بعمل مسح كامل عبر بوابة الحافلة لتمسح كل ما أحمله لحظة دخولي للحافلة , فهي كانت ( مراقباني ) ببعض الأجهزة حتي دخولي الباب , وأدهشتني بأن لها جهاز قام بالإقتران بالأجهزة التي في باب الحافلة فيرسل إشارات المسح للجهاز الذي مع ( الزوجة )..

فعرفت أن حكاية ترسل رسالة والزوجة مابتعرف تفتح الرسالة أو إنت تضرب تلفون والزوجة ماتعرف ياتو البيفتحوبو الخط بياتو بالأحمر واللا بالأخضر دي إنتهت وحكاية تضرب 20 مرة عشان تسأل : دايرين شنو عشان أجيبو ؟ عرفت أن دي بقت موضة قديمة .. وأذكر زمان لحدي ماتصل البيت , وتلقي الزوجة في المطبخ والتلفون في الصالة يئن ويرن وتجد مكالمات لايرد عليها لاحصر لها وعدد الرسائل , يكتب الهاتف في الشاشة ( لايوجد مكان لرسالة ...موافق ؟ )ده لو مافي ( شافع ) فتح عليك كمل باقي ال500 بتاعتك !!
معقول هل إنتهي ذلك العهد !!!
هل إنتهي عهد المسكول ؟؟!!
وإنتهي , لمن تصل أعمل لي رنة ,
ولو لقيتو مافي أعمل لي رنتين ,
ولو العشاء قائم أعمل 3 رنات ...

وهل إنتهت الإتفاقات السرية بين الأزواج ,
لو دايرة عيش , سوي لي رنة واحدة .
ولو دايرة طماطم سوي رنتين .
ولو دايرة بصل سوي تلاتة رنات .
بل الآن أصبحت ( الزوجة ) تقنية خالص وهي اللي عملت مسح لما أحمل بكيسي ولو كانت ( قفة ) برضو كان ( كفشتها ) , وعرفت أن الحياة أصبحت سهلة وأن ( الخرطوم ) سبقت غيرها في التقنية , ولكني شككت : أهذه حافلة الشعبية ؟!! فأنا أعرف الشعبية وحافلاتها جيدا" .... فقررت التأكد وانا نازل ....
وأنا نازل , فإذا بي أجد الشريط الأصفر ( المابغباهو ) ...

فبدأت أتساءل ياربي دي سنة كم ؟؟
وهل أنا عشت لهذا الزمن ؟ وهل أنا شاب وفي عنفوان شبابي وأدركت هذه التقنية العالية .....؟؟؟

فماهي إلا ولحظات وإستيقظت من النوم لأجد شريط الحلم الجميل الذي مر بي و لطالما تمنيته أن يمتد لأعيشه ولأستمتع به , بل تمنيت أن يطول حتي أري المزيد من التقنيات .. , فقد لا أعيشه وأنا مستيقظ وصاحي وواعي ,,,

وكان ذلك الحلم في نهار رمضان , فهل راودتني تلكم الصورة هذه لأني صائم وذهني صافي ؟! هل لذلك راودتني تلكم الأحلام الجميلة ,أم لأني ( بت ) ليلتي السابقة , وقد كتبت دونت بعض البيانات وسجلتها علي سطح المكتب , فلذا كانت أصابعي قد نامت وفي أطرافها شئ من ( الكي بورد ) , فأصبحت أطرافا" آخر مالامسته التقنية , فأصبحت تنشد التقنية !!

فقد إستيقظت وأنا أفكر في المشوار الذي سأذهب إليه وهو علي بعد 143 كيلومتر وليس لدي وسيلة مواصلات , فراودني الهم , كيف سأنجز هذا المشوار ؟؟؟ وفعلا" وقفت علي الطريق فلم أحظ بحافلة ولا ( ملح ) ولا تاكسي , فرجعت أدراجي للبيت وأنا أحمل مفارقات مابين ( اليقظة والأحلام ) فسؤالي لكم هل صدق ( حمد الريح ) حين ترنم :-

بين اليقظة والأحلام ,,,,,,,,بين اجفان تقول للنام .
أريت النوم يزورني اليوم,,,,, أنوم لو ليلة في كل عام.

نعم ياحمد الريح يا أستاذ تمنيت أن النوم يزورني اليوم , بل ( بلال تزورني مرة ) , نعم أنا واقف ياود توتي , ومالا قي مواصلات , فقد تذكرت الأبيات أعلاه وتمنيت مارأيته في النوم أن يكون حاضرا" وماثلا" أمامي .. وهل ماتراه أيها الفنان صحيحا": - أن مافي النوم أجمل من اليقظة ؟! فأنا أري أنها مقارنة جيدة بين اليقظة والأحلام ..

في البدء سميت بوستي ( بين اليقظة والأحلام ) , لكنني أدركت أن جلكم سيتعرف علي خاتمته وبصراحة خفت من نهائي مبكر ..

ياخي احلامك وردية وبريئة كلها دليل على صفاء النفس والروح ..
انا لي سنين احلامي كلها قتال وحروب وشكل ..
آخر حلم لي : كنت بجلد ابووردة بالسوط في ظهرو في عرس في العبيدية
بس ما تسألوني صمد ولا اتجرس ... لانو ربنا أمر بالستر

أما بالنسبة لباب الباص بتاعك المحروس بجرس الانذار :
طيب انا لو عندي قنبلة ممكن ارميها جوه الباص بدون ما ادخل , دي يحلوها كيف ؟

وبعدين عاوزك تمشي تنوم تاني , وتتأكد في الحلم (بين اليقظة والاحلام) دي أغنية البلابل ولا حمد الريح ؟

اقتباس :: فسالتها , فأزالت غموضي بأنها قامت بعمل مسح كامل عبر بوابة الحافلة لتمسح كل ما أحمله لحظة دخولي للحافلة , فهي كانت ( مراقباني ) ببعض الأجهزة حتي دخولي الباب , وأدهشتني بأن لها جهاز قام بالإقتران بالأجهزة التي في باب الحافلة فيرسل إشارات المسح للجهاز الذي مع ( الزوجة )..

براكم بجيبو الهوا لنفسكم اسة الحروم لو شافو كلامك دا مابيمسكوه من النص
ويروح يفتشو وراء الحاجات دي وحتي لومابتركب باص وعندك عربية خاصة الاتركب ليك الشغلة دي في عربية الخاصة
والمصيبة لوركبت معاك واحدة عايز توصلها شهامة ساكت منك ودهبها ظهر في المسح نان ماصباحك اصبح

اخوي شبس تعرف انا في مرة قعدت احلم احلام يقظة كدا وفوزت ليك بمليون ريال اتخيل عملت بيها شنو
عرست لاصحابي كلهم والقروش كملت وفضلت انا عذابي شفت الحالة دي كيفن اوكر الجماعة من قروشي

حبيبنا سيوف صدقني ابووردة يستاهل اصلو منجضنا نجاض وعارف بيكون حصل عليه شنو

لك النحية اخوي الرائع دوما شبس والتحايا ملايين

خلينا عايشين الزمن الجميل ، أعتقد أنو ممكن يكون زمن أولادنا لكن ياسيف الدين نعم لحمد لكن الإيقاع هو إيقاع البلابل الرصين الجميل لزمن جميل ، بعدين الجاب سيرة القنابل شنو حمانا الله من الشر قلبتها لينا طالبان وأفغانستان شبس لامن قريب ولامن بعيد جاب سيرة التفجيرات ، إنت أصلك حلمك كان كلوتفجيرات ، سعدت بالإيقاع الجميل والسرد اللطيف والأحلام الورديه لكن ليس ببعيد على الله ، نسأله العافية والقبول مع التقدير ، حيث بدأنا التقنية من حيث إنتهى الأخرون .

الأخ / شبس

والله سرد جميل و شيق جعلني أحار وأتساءل هل من الممكن أن تصل هذه التقنية لبلدنا التعبان يوماً ما ؟ وهل ممكن أن تصير أحلام اليقظة حقيقة ظاهرة للعيان في بلدنا البائس الفقير ؟!!!!!!! والله على الله ما بعيد وكل شيء ممكن ، لكن المشكلة الآن تركب الحافلة في الأيام دي وتكون الأرضية مهتوكة وترى الأرض أثناء القيادة لحدي ما راسك يلف ويصيبك دوار .
. حبيبنا شبس بصراحة كده سيوفوا قبضك فكلمات الأغنية التي ذيلت بها موضوعك هي فعلاً للفنان / حمد الريح وليست للبلابل بس إنت الظاهر رجوع البلابل للساحة الغنائية بعد غيبة طويلة خلط عندك الموازين شوية

دمت ودام ألقك والتحايا لك وللأسرة الكريمة وخصوصاً الصغيرة إيثار

[b]فعلا" يا أبو السيوف والهادي الشغيل , راجعت الموقع اللي طلعت منو أغنية ( بين اليقظة والأحلام ) وعرفت إنها لحمد الريح والرابط هو :-

https://www.facebook.com/topic.php?uid=41895710138&topic=9163

وبس كان فيهو كمية من تراث البلابل زي ( نور بيتنا ) و ( قطار الشوق ) و ( رجعنالك )

والسبب التاني : عرفتو إنو ( دقستي ونومتي كانت كيف , حتي الأغنية ماعرفتها لمنو )

والسبب التالت : عرفتو إنو أنا أيام المدرسة كنت بنوم من 9 ومابحضر حفلات وأجي 4 ص وبنط ب ( الحيطة )

يا أبو السيوف كل سنة وإنت طيب .

طلعت بتاع حفلات وأنا طالب بنوم من 09 مساء لأنو إنت عرفتو حمد الريح وأنا قايلو البلابل !!

لكن بيني وبينك نحن في حافلة السواق معزول بعازل , كيف يكون شباكها ( مهتوك ) ؟؟

إنت قايلها دي زي الحافلات الممكن تنط ونحجز بالشباك أو الواحدة ( تخت ) شنطتها وتحجز بيها أو إنت ( تخت ) كيس خضارك .!!

ده بيكون مقفل بزجاج سميك , وأكيد حيكون عالي ومكيف ....

آها ....... إيه رأيك ؟

شبس كتب:: والسبب التالت : عرفتو إنو أنا أيام المدرسة كنت بنوم من 9 ومابحضر حفلات وأجي 4 ص وبنط ب ( الحيطة )

هل صدق ( حمد الريح ) حين قال :-.............؟؟ 120720

طيب عرفت كيف انو بينطو بالحيطة اوع تقول سمعت بيقولو كدا ميه في الميه
سويتها يوم وجيت مع صلات الصبح والحاج قايم يصلي الصبح في المسجد ولقاك فوق الحيطة
وخدت الفي النصيب ومن يوم اتعلمت النوم من الساعة تسعة دي لو قلت كدا بنصدقك

أقول لك شنو يا ( ياود جمعة )

غايتو بس برد عليك ب ( بدون تعليق )

عبد الفتاح الله يديك العافية وأشكرك علي إبداء إحساسك بما أحسسته وكتبته , ووضحت للأخ : أبو السيوف إنو أنا يبدو إنو كنت طال منضبط وبنوم بدري من 9 وما عارف البيغني بعد 10 يكون ده ( الذكار ) واللا ( حيدر ) لذا ماعرفت دي حقة ( البلابل ) واللا ( حمد الريح )

تخريمة :: أسة ود جمعة حينط لي ...

شفت أحلام ( أبو السيوف ) جابت شنو ؟؟؟ قنابل وبمبان ودخان ,,,

الله يستر,,

ناس بتحلم أحلام جميييييييييلة وناس بتحلم بالقنابل ..( مع الإعتذار للجابري )
أوع تكون بتاعت ( سيد خليفة يا سيف )

الهادي الشغيل

أشكر بصماتك وإستحسانك للمقال , وفي أمل إنو قريب نصل تقنية عالية ,,, لكن ذكرتني بالأرضية المهتوكة ( قصة الحبشية اللي ثوبها لف في عمود الطوالي وماتت خنقا" أمام ناظري ركاب الحافلة )

فعلا" رجعت للمقال الخاص بالأغنية في الرابط

https://www.facebook.com/topic.php?uid=41895710138&topic=9163

لقيت الأغنية لحمد الريح ....

لكن المقال عنوانو أجمل , لأنو هل يمكنك تصديق الثلاثة أم الواحد ؟؟ من الأقرب للتصديق ؟؟؟

لكن لرد الحقوق سوف أعدل العنوان قريبا" .

محمد جمعة كتب:: طيب عرفت كيف انو بينطو بالحيطة اوع تقول سمعت بيقولو كدا ميه في الميه

كان بيصحا لما الهادي ينط ياخي

كلامك صاح يا أبو السيوف

عليك الله خبر ( ود جمعة ) بإستنتاجك وإكتشافك ده ....

دي فرصه ماحيفوتها في ( الهادي العجب )

سيف كتب :

اقتباس :

شبس كتب :

اقتباس :: كلامك صاح يا أبو السيوف

لا يا جماعة أنا كنت بنط في الحيطة بعد حضور الحفلة الساعة 2 صباحا عشان أصحي شبس لقيام الليل

تخريمة 1
دردشتكم دي دي الجابت ليها نط من فوق الحيطة .. ذكرتني أحد ظرفاء عطبرة ويدعى السر عكاز مشهور بالتمتمة (تمتام)وكان بتاع دخان وكريستال بلح حتى درجة (قف) .. ساكن خلف جامع عباس محمود .. كان جاي الساعة 2 صباحاً من حفلة في الموردة والمشوار طويل وعطش فقام نط في الجامع عشان يشرب من المزيرة بتاعة الجامع .. أها قام الغفير صحى واتخلع بعد ما شاف السر عكاز فوق الباب من فوق .. فصرخ خائفاً .. أعوذ بالله من الشيطان الرجيم .. فقال له السر عكاز ( إقرأ) فصرخ الرجل من الخوف (ما أنا بقارئ) .

تخريمة 2
السر عكاز طبعاً شغال عطشقي في السكة حديد .. كان في بورتسودان وجاي عطبرة يحضر عيد الأضحى مع أهلو .. أها في سنكات لقى ليهو خروف سمح خلاص .. اشتراهو وطبعاً زي ما عارفين محطات السكة حديد بين بورتسودان وعطبرة خلوية . والخروف جاع شديد وبقى ما عندو شغلة غير (باع باع) .. المهم السر عكاز لقى ليهو في محطة من المحطات كنتين صغير واشترى منو (شعيرية) وأداها للخروف .. الخروف من الجوع قرمش ليك الشعيرية كلها (4-5 أكياس) .. أها انتهت الرحلة ووصل السر عكاز لبيتهم وأبوهو فرح فرح شديد بالخروف .. وقام ركب ومشى القشاشة وجاب القصب للخروف .. الخروف شمّ القصب وأبى ياكل كلو كلو .. استغرب والد السر وقال ليهو : إنت يا السر خروفك ده مالو مابي القصب وماراضي ياكل .. قام السر قاليهو وهو يتمتم (يا أبوي خروفي ده بياكل نواشف بس) ..
ههههههههههههههههه

الهادي محمد عمر الشغيل كتب:: فقال له السر عكاز ( إقرأ) فصرخ الرجل من الخوف (ما أنا بقارئ) .

هل صدق ( حمد الريح ) حين قال :-.............؟؟ 994410

يعني لو قرأ كان طلع لينا رسول عطبراوي

فرمت مصارينا ياخوي الهادي
القرقرة دي للقفشات الجايبه فوق

هل صدق ( حمد الريح ) حين قال :-.............؟؟ 98779

اما البسمة الصفراء دي لكلامك الغير مقنع بخصوص نط الحيطة الساعة اتنين بعد حضور الحفلة قال بصحيه لقيام الليل تهي تهي

شبس يارائع مادام اعترفت بالزول بالبينط الحيطة تب ماني متعكلت فيك بس اسعلك سعال كدا انت سيف
دا عايز يتدرب علي باصك للجهاد واللا خلاص خليتو سعالي ماتجاوب عليه
وهاك دي بخصوص الحفلات الصباحي في واحد في الداخلة كان جنو حفلات وابوه راجل بتاع صلاة
بيصلي الفجر في المسجد وكل مرة قابضو ليك ومرات طرده قال ليها روح نوم محل ماكنت
وصاحبنا عمل كل الحيل وحتي مرة فكر يدخل البيت في وقت الصلاة علشان ابوه بيكون في المسجد
مانجحت حكايتو ليه لانو ابوه اول مايقوم للصلاة بيصحيهم كلهم واليوم داك ماكان مشئ المسجد
طيب صاحبنا مرضانا حفلات وماقادر يخليها المرة دي عقلو الهمو لفكرة وهي اول مايصل البيت يدخل العجلة بالخلف
طبعا البشوفو يفكر انو خارج وبالفعل عمل العملية دي وصحي ابوه ياود ماشئ وين قال ليه الشغل
قام ابوه قال ليه قول بسم الله ياولدي الواطة لسة بدري وتاني حاجة اليوم جمعة روح كمل نومتك
شفت كيف الفكرة نجحت يروح ينوم بمزاج من غير ازعاج افتكروه محموم وحسب الحمة ماشئ الشغل يوم الجمعة

لكزة للهادي
انت ياخوي حلم حبيبنا سيوف دا خليتو يمر ساكت كدا مالك واللا عامل هدنة مع الموجود داخل الحلم

الرائع ود جمعة

الرائعون : أعضاء المنتدى
الليلة مش بفرم ليكم مصارينكم .. بل بهردها عديل كده
----------------------
السر عكاز ده التقيتو شخصياً كثير وجلست معه .. فهو قريب أستاذ طلحة (مدرس سابق بمدرسة الخدمات المتوسطة وأشقائه خالد مهدي وأزهري مهدي ) خالد ده الله يطراهو بالخير زميل دراسة وصاحبي يسكن الامتداد الشرقي وأنا كنت بروح ليهم في البيت وكثير ما ألاقي السر عكاز قريبهم في البيت جاي زيارة ..
السر عكاز ده عامل بسيط بالسكه حديد وزول مسخوت وصاحب مزاج الله يهديه إشتهر بمعارضته وقفشاته الظريفة وعباراته الساخرة مع تمتمه (تاتأه) تعطي نكاته نكهة عجيبة ولكنو مسخوت يستخدم الايات ومأثورات السيره في مواضع عجيبة فتأتي المفارقة المضحكة :
من قفشات السر عكاز
ذات مره وعكاز راجع مع شلة الأنس من حي المطار في آخر الليل وبعد أن خربوا الروؤس (وزنو الدماغ) لم يجدوا فلوس عشان يشتروا السم الهاري زواده يشيلوها للبيت .. وكان احد الندماء شايل قروش فاشترى قزازه ودساها في كم الجلابيه دون أن يعلم الباقين .. وهم يترنحون في طريق العوده وقعت القزازه من صاحبهم اندفق الشر في الارض ... علق عكاز بقوله : وقد خاب من دساها !!!!
-------------------
وعندما اتخذ النميري (رحمه الله) قراره الشجاع بتطبيق قوانين الشريعة الاسلامية وتم كسر القزاز وسالت الأرض أودية من الخمر ... همس عكاز لرفقاء مجونه : نميري دا صاحب مزاج قديم وهسع تلقاهو حاسد الواطه على الكميات الكبيره الشربتها دي وتلقاهو يقول في سرو : يا ليتني كنت ترابا !!!
-----------------
شيخنا عباس الخضر قبل الانقاذ كان رئيس النقابة وزعيم ثوري للعمال وكان إمام العمال في سجون مايو وكان بيحكي ليهم قصص الطغاة وصمود الانبياء منذ عهد سيدنا صالح وقوم ثمود ... بعد الانقاذ شيخ عباس بقى مدير صندوق دعم الشريعة وركب لاند كروزر فارهة (ليلى علوي) (مطية الشيوخ بعد التمكين) .. شيخ عباس وقف بالفارهة قدام بوابة السكه حديد وفي اللحظة دي جا عكاز ماري والعربيه بت علوي قافله مدخل البوابه .. فخاطب شيخ عباس : كدي يا مولانا زح لينا ناقة سيدنا صالح دي لي غادي ...

مرة السر عكاز دخل بالغلط مسجد في أحد الأحياء يوم الجمعة وفي أثناء الخطبة بدأ يتحدث الإمام عن سوء ما وصل إليه الحال حيث استشرى الخمر وانتشرت بيوت العرقي في كل مكان وقال ( هسع بوراء الجامع ده بشارعين في واحده بتبيع العرقي) ، السر عكاز من جابو سيرة العرقي قعد يتململ فما كان منه إلا أن إنتظر بفارغ الصبر إنتهاء الخطبة ثم الهرولة إلى حيث بيت العرقي المجاور للمسجد ، فعندما وصل سأل الحاجة (من متين إنتي شغالة في الشغلة دي ) ؟!... قالت ليهو أنت وين الزمن دا كلو إنت ما عارف؟! إستغرب السر عكاز وقال ...والله أصصصلو ما كنت عارف!، إلا حسع الإمام وررانا ورانا في المسجد

ههههههههههههههه

يا الهادي والله حرام عليك
السر عكاز ده يستحق كتاب كامل للتوثيق عنه منفصلا
تقوم تجيبو لينا مع احلام شبس الافلاطونية دي ؟ هل صدق ( حمد الريح ) حين قال :-.............؟؟ Icon_lol

بالجد كده :
حاول حتى (تستعين بصديق) لتجميع شتات هذا الرجل في قسم منفصل
عشان لو مر على الموضوع زول تاني يرمي لينا حاجة عنه ما مذكورة

ياخي مع روح الفكاهة في حاكايته تقدر تستخلص منها ملاحظات اجتماعية جميلة

اول حاجة:
الزول ده لسه عايش ؟
لانو ممكن تستعين بيهو هو نفسه يكتب مواقفه الطريفة

الأخ / سيف
السر عكاز مازال على قيد الحياة ومازال ينشر الفكاهة وينتزع الضحكة ويبعث روح الدعابة وقد التقيت به خلال إجازتي الماضية قبل سنتين ، ما أن تراه إلا وتضحك حتى قبل أن يتحدث أو يعلق تعليقاتو الساخرة ، للسر عكاز إبن خال إسمو خالد مهدي في الرياض وهو على اتصال دائم بي وسأتحدث معه لنجمع هذا الكم الهائل من الضحك لهذا الظريف الذي قيمه بعض الناس أنه أفضل ظرفاء عطبرة على الإطلاق ، لذا حرى بنا أن نوثق له .

ايوه بالله يا الهادي
فما احوجنا للضحك وللتوثيق معا

والزول ده انا كنت بسمع عنه بس مع الاسف ما حصل لاقيتو
لانو نحن قعداتنا كانت بالايس كريم والبيبسي كولا
وإن كترت خلاص .. بشربوت الضحية

امانا مامردغتنا جنس مردغا ياخوي الرائع الهادي
وذي ماقال ليك حبيبنا سيوف السر عكاز لازم تفتح ليه بوست خاص لاننا حقيقة نحتاج التنفيس
وكمان يبقي توثيق له

ان شاءالله البسمة ماتفارق وجهك قول آميـــــــــــــــــــــــــــــــــــــــــن

لفة صغنونة بالشارع التاني

سيف الدين كتب:: والزول ده انا كنت بسمع عنه بس مع الاسف ما حصل لاقيتو
لانو نحن قعداتنا كانت بالايس كريم والبيبسي كولا
وإن كترت خلاص .. بشربوت الضحية

قول انا صدقتك البخلي ناس هناي ديك متل اخونا اول حرف من اسمو ابووردة يصدقوك شنو

الأخ / سيف وبقية الأعضاء

كما وعدتكم فقد قمت بالإتصال بقريب السر عكاز الأخ / خالد طلحة وأخبرته هاتفياً بأننا نرغب في عمل توثيق لجمع كل أحاديث ودعابات السكر عكاز فضحك وقال لي ( أها يا أبو هريرة) وقد رأيته استصعب ذلك وتحجج بعدم وجود الوقت وقال لي سأحاول .. لكن الحمد لله يوجد في عطبرة أخونا محمد سيد عبد العزيز

هل صدق ( حمد الريح ) حين قال :-.............؟؟ 18291-1-777432952

وهو أحد أعضاء منتدانا ومن الأعضاء النشيطين ويعرف السر عكاز حق المعرفة .. وقد عرفت ذلك صدفة عندما قمت بإنزال بوست في الفيس بوك على على الرابط أدناه :

https://www.facebook.com/monty.zaki?v=wall&ref=notif#!/note.php?note_id=129242127126163

فعقب وقال ما يلي :

محمد سيد عبد العزيز ياأخي طبعاً السر عكاز دا كان بيقعد جنب بقالة ابوسعيد دائماً وكنا أحيانا نجلس بقربه لنسمع نكاته . يازول الجنا دا داهية خلاص ( بجيك صادى بحكاوي أب كاز)
تحياتى

كما أورد أخونا محمد عبد العزيز الفكاهة التالية عن السر عكاز مدعماً حديثنا عن هذه الشخصية الذكية حاضرة البديهة ، فقد عرف عن السر عكاز أنه يمتاز بالظرف وأنه مسخوت يستخدم الآيات القرآنية ومأثورات السيرة في تعليقاته فتأتي المفارقة العجيبة
أورد أخونا محمد سيد عبد العزيز ما يلي :

محمد سيد عبد العزيز قالوا مرة كانت الموية فاتحة فى أزيار المسجد ولا الزاوية على ماأعتقد فقال له أحدهم كدى ياأبعكاز شوف الزير دا الموية وصلت فيه وين فعاين السر عكاز فى الزير وهو يصيح: نصصصفه أو انقص من قليلاً

تخريمة :
لذا أرى أن يتم تكليف أخونا محمد سيد عبد العزيز بهذه المهمة وإسنادها له وهو أهل لذلك

الهادي محمد عمر الشغيل كتب:: نصصصفه أو انقص من قليلاً

دي ياها الفتوى القاعد لي شهر منتظرها منكم (افتوني في هذه الفتوى)
ياخي السر عكاز ده بالاضافة الى خفة دمه .. سأتخذه شيخا لي

وفي انتظارك يا محمد سيد .. وما بنقبل اعتذار وأعذار Laughing

في انتظار الجديد للترويح عن النفس