عندنا زول اسمو (الطهربنجي).

< الطهربنجي دا زول صعب..لو شاف ليه (شكلة) ما بقعد يحجز...بشارك عديل في (الشكلة).

< بترصد المشاكل ..وبتعقبها ..بفتش ليها فتيش.

< لو في زول ضرب ليه بالغلط ..بقول ليه : انت هسع قاعد وين؟..عشان اصلك (اقدد) ليك عيونك ديل.

< موش عادي (النمرة تكون غلط).

< لا هو ما عندو الحاجة دي ...البضرب ليه بقول ليه : انت يا زول عاوز منو؟.

< العجب الزول الضارب ليه بالغلط لو قال ليه : دا تلفون تهاني.

< عيونو يبقن زي الجمر ..يقول ليه : تهاني في عينك ..انت لو شفت (الشنب) دا ما بتقول كلامك دا.

< يا زول احسن ليك اعقل وامشي عدل.

< نحن حلتنا دي كلها ما فيها (تهاني).

< تهاني العيد ..ذاتها ما بتعرفها ..عشان اختصر ليك المشوار.

< الطهربنجي دا زول صعب.

< قلت ليكم أي شكلة بيبقي (سيدها).

< بستلم الموضوع.

< اليوم البمر وما يشاكل ليه فوقو زول بيبلع ليه (بندول).

< زول صعب بالجد.

< الطهربنجي دا قالوا وقت كان صغير ..في أي يوم برجع (مفلوق).

< الفلقة عندو زي (العداد).

< لو ما اتفلق ما بنوم.

< اتعود كدا.

< رأسو بقي زي (خريطة العالم) من الخياطة الكتيرة.

< الدكتور في الحوادث زهج منو ..قال لي ابوه : ولدكم دا تاني ما تجيبوه لي.

< انا قريت 6 سنوات طب.

< وسنتين امتياز.

< و12 سنة تخصص ..ما عشان اقعد اقابل ولدكم دا.

< انا عندي شغل تاني ..واهتمامات اخري.

< ما معقول اقعد اباري ولدكم دا.

< كاسروكا ...يقصر.

< ناس المريخ اول ما شافو (كاسروكا)..شافوه (مفلوق).

< اعجبوا بالحكاية دي.

< قالوا بس دا (ولدنا)...نحن لينا زمن بنفتش لينا علي زول (فدائي) كدا.

< زول قلبو حار.

< ولادنا ديل الواحد بيلعب 3 مبارايات وبقيف 6 شهور للاصابة.

< ولاد الهلال البتتكسر ليه (ضلعة) بيلعب.

< البتصاب في كتفو ..بيلعب.

< البموت ليه زول ....بيلعب.

< البتتكسر ايدو عديل كدا بيلعب.

< المريخاب ..اذا اتصاب (كلتشي)..طمبل بمسك كراعو.

< اذا اضرب سفاري ..الباشا يقع.

< طارق مختار دا عارفنو (وقع) ليه في (النيجر)؟.

< عشان موسي الزومة لياقتو كعبة.

< انا اول مرة اشوف لي مدافع بقع علي وشو.

< لو دي طريقتك يا طارق مختار ..من هسع ما تنتظر (بكري المدينة).

< شوف ليك بلد.

< شيل ليك اورنيك.

< شيل (دفتر العيادة).

< بكري المدينة حالف يسمع ليك نشيد العلم بتاع الصين.

< النشيد الوطني الصيني يعني.

< لو ما حافظو ..احسن تتخارج.

< بتجيب لي نفسك (هوا) ساكت.

< وتقعد (تتحورج) فينا.

< خلوه (الحورج) هسع.

< المريخاب عندهم (عقدة) من فييرا.

< اللاعب الوحيد القلبو حار في المريخ في عهد جمال الوالي ..مشي الهلال.

< حمودة بشير سبقو.

< جماعتكم ديل بقي عندهم عقدة من حرّة القلب.

< من فييرا فات ..بقوا لو شافوا ليهم (كرت احمر) ساكت بلاوزوا.

< بهضربوا.

< بصم ..ما بصم ..بصم..ما بصم.

< عشان كدا الجماعة ديل وقت شافوا (كاسروكا) مفلوق ..قالوا بس ..(الفلقة) دي فوق رأي.

< طبعا (كاسروكا) مع اتراكو كان بيلعب زي الطلقة مع انو كان (مفلوق).

< عرف ليك نقطة ضعف المريخاب ..قام قعد ليك مع ناس الهلال.

< ناس الهلال قالوا ليه لو عاوز تسجل في المريخ (اتفلق)..وخلي الباقي علينا.

< قام كاسروكا (اتفلق).

< المريخاب اعجبوا بالفدائية ..وافتكروا (الفلقة) تحتها (مناضل).

< زي واحد كدا.

< شاف ليه (بنت) في حفلة في شريط فيديو..اعجب بها وقال دي البنت الممكن تشاركني حياتي.

< يا البنت دي ..يا ما عاوز عرس.

< زمان طبعا في (حنك) كدا.

< الواحد يقول ليك : (يا البنت دي يا ما عاوز عرس).

< زولكم شاف البنت في شريط الفيديو ..قال دي (الشريكة) البفتش ليها ذاتها.

< انت حياتك مشاركك فيها سيد البيت وسيد اللبن وسيد الدكان وسيد العدة ..حياتك بعد كدا فضل فيها شنو؟.

< زولكم شاف البنت في الحفلة في شريط الفيديو ..اعجب بها ..(اتكسر) في شعر نزار قباني.

< بقي لو سلمت عليه ساكت يخش ليك في:

اليوم عاد وكأن شيئا لم يكن

وبراءة الاطفال في عينيه

ليقول لي اني رفيقة دربه

وبانني الحب الوحيد لديه

< زول بقي صعب ..تقول ليه وين يا زول ؟..يدخل ليك في نونية ابن زيدون.

< زول صعب.

< زولكم ما عارف أي بنت في (الفيديو) بتظهر سمحة.

< كلهن بظهرن زي (القمر).

< كلهن الملكة ديانا.

< شفتوا ليكم واحدة في شريط فيديو (عائشة الكيلاني) او حتي (انعام سالوسة).

< على هذا الاساس ..زولكم مشي يطلب يد البنت.

< البنت جات شايلة (الشربات).

< الخفة شنو يا بنت الناس.

< الزمن دا الواحد لو مشي يطلب (يد) الفندك ..يجيبوا ليه (الشربات).

< مرات من الخفة.

< الشربات براهو بجي.

< زولكم اتهجم ...شاف ليك (الشربات) متل رايات الكورنر ...قال ليهم دي البنت الفي الفيديو.

< قالوا ليه : ايوة...يعني دي البنت الفي الكوتشينة.

< مالك انت يا زول.

< يا جماعة انتوا متأكدين ..دي البنت الكانت بترقص في اغنية (الدنيا تحلي).

< قالوا ليها : ايوة دي البنت نفسها.

< زولكم قام ومسك شبطو في ايدو ..وقال ليهم ان بقي كدا (خديجة) بتاعة البوهية البتقع من (البلكونة) بتكون شينة ..شنة مرة.

< وفللي.

< خديجة هسع ذنبها شنو؟.

< هسع ناس المريخ شافو (كاسروكا)..مفلوق ..قالوا دا زولنا.

< هو كاسروكا براه.

< وارغو جاب ليه اقوان في الهلال ..قالوا خلاص دا اللاعب البنفتش عليه من زمان.

< هسع انتوا بتذكروا لاعب في المريخ اسمه (هيثم المرابط).

< المريخاب ديل ما خلوا ليهم هيثم.

< عقدة ساكت من (هيثم مصطفي) حفظه الله ورعاه..ما خلوا ليهم هيثم حايم في واطة.

< جابوا هيثم الرشيد ...ما نفع.

< جابوا هيثم كمال طمبل ..برضو ما نفع.

< ديل هيثم العشرة ما خلوه.

< اخر حاجة قالوا نحن نجيب لينا واحد (مرابط) عديل.

< جابوا هيثم المرابط.

< المرابط رابط ليهم في (الفندق).

< انتوا زولكم دا (مرابط) في الكنبة وإلا شنو؟.

< كروجر قال ليهم : ما عاوز اشوفو في التمرين.

< نرجع ليكم لـ (الطهربنجي).

< الطهربنجي دا عامل فيها جعلي.

< يمشي أي حتة بقول انا باكل النار ..انا صعب ..انا ما في حاجة بتقيف قدامي.

< انا الطهربنجي.

< الطهربنجي يقول انا ما بخاف من أي حاجة ..يقوم يظهر في الشارع (اسد).

< الطهربنجي يقوم جاري ...يقول إلا الاسد.

< الاسد ما بفرز السوداني من الصيني.

< انا متأكد لو عارف اني جعلي ...ما بعمل عمايلو دي.

< طبعا الطهربنجي عامل فيها (جعلي).

< تاني الطهربنجي يرجع يقول انا صعب ..انا خطير ..انا ما بخاف من أي حاجة.

< يقوم يظهر (كلب) في الشارع.

< الطهربنجي يقوم جاري ..يقول يمكن الكلب دا يكون سعران.

< انا ما خايف من الكلب من حيث هو ..لكن خايف من الـ 21 حقنة.

< وانا عندي حساسية من الحقن.

< الناس تمشي لي الطهربنجي.

< الطهربنجي تاني يقول انا صعب ..انا خطير .انا الاسد النتر...نحن بنخوض النار..بناكلها اكل.

< يقوم الطهربنجي يقع ليه في (جمرة)..زولكم ينط.

< يقول إلا (الجمر) لكن تاني ما في حاجة بنخاف منها.

< الطهربنجي تاني يقول انا صعب ..انا خطير ..انا الاسد النتر ..زي الحاجات البعملوا فيها ناس المريخ ديل.

< الطهربنجي تتطعنو (شوكة)..يقوم يتجرس.

< الجماعة يقولوا ليه افو يا الطهربنجي ..(شوكة) تجرسك كدا.

< الطهربنجي يقول ليهم : إلا (الشوكة)...لكن تاني ما في حاجة بتقيف قدامي.

< والشوكة ذاتها لو ما فاجأتني ..ما بتعمل لي حاجة.

< انا صعب ..انا خطير ..انا الاسد النتر.

< تقرصو (نملة).

< يقوم يتجرس تاني.

< افو يا الطهربنجي...انت مالك بتتكلم ساكت زي (الاعلام السالب).

< يا جماعة انتوا قايلين قرصة النملة حاجة ساهلة.

< قرصة النملة دي في الصين بترقد مستشفي عديل..بس هنا عشان ما عندكم رعاية بالناس.

< الصين هسع ذنبها شنو؟.

< ملحوظة: هسع في جماعة تلقاهم زعلوا.

هوامش

< عكسيات عبداللطيف بويا ..بقت اخطر من عكسيات يوسف محمد.

< أي عكسية لعبداللطيف بويا قون.

< الشيء شنو؟.

< الشيء بالمقاس.

< غدا مباراة السودان وغانا.

< ننتظر ظهور مشرف لي بكري المدينة.

< بكرة بكري المدينة عندو قون.

< نتمني ان يخرج المنتخب السوداني بنتيجة جيدة.

< منتخب غانا يعاني من بعض المشاكل.

< مصطفي النقر حذر من الارهاق الذي قد يظهر على لاعبي الهلال في المنتخب من منطلق المباريات التي لعبها الهلال في فترة وجيزة.

< مباراة الهلال امام الجيش نرجو ألا يهملها الهلال.

< ميشو سافر ...ويوسف محمد ..سادومبا ...وهيثم مصطفي في الاردن.

< كذلك هناك مباراة غاية في الاهمية للهلال في الدوري الممتاز امام الامل عطبرة.

< مباراة الامل هي مباراة البطولة بالنسبة للهلال.

< الترجي والاهلي ...على موعد مع (النار).

< شبيبة القبائل ومازمبي ...(موت احمر).

< الاتحاد ودجولبيا ..مباراة هي الاخري غير ساهلة.

< الهلال براه الذي سوف يلعب مرتاحا.

< الجيش عندو (نقطة).

< الفريق الذي اخرج المريخ عندو (نقطة).

< نحن طبعا قاصدين الحكاية دي.

< نحن أي حاجة عندنا بي نظام.

< الجيش دا ما عاوزنو يزيد فوق النقطة.

< عشان ناس (الوصيف) يفهموا حاجة.

< والله ان خايف بعد دا ما يفهموا حاجة.

< خبر عاجل : لكن في ناس بفهموا لكن بتظاهروا بعدم الفهم.

المصدر : قوون

شكرا ود شرف رائع احييك

أها ولما الطهربنجي قابل الصفاقسي ..
سمى نفسو البرنجي ؟