ليه يا راجي تعمل كده , تخلي الراجل يطلق المرة

بعد هزيمة الهلال النكراء من المريخ 2/صفر ..
عاد المشجع الهلالابي الى منزله بالعرضة شمال حافيا ، فقابلته زوجته مستغربة حضوره حافيا ..
وسالته : خير يا ابو وردة و ين مركوبك يا راجل ؟
قال : الله ينعل ابليس لقد قذفت به لعيبة المريخ فى الملعب .
المهم زوجته طيبت خاطره وقالت ليهو : ما عليك يا رجل الاسبوع الفات انتو ما كنتو فايزين ..
قال : يا مرة انتى مجنونه 2 صفر وفى استادنا وكمان الهدف التانى من راجى !!!
المسكينه عاوزه تغير الحديث قالت : عليك الله كدى موبايلك ده عاوزه اكلم اختى فى السعوديه
قال ليها : كلميها من التلفون الثابت
ردت بحسن نية شديده : اجى يا ود امى انت ناسي انو انت لغيت الصفر الدولي من التلفون الثابت , وبقى ما عندنا الصفر الدولى إلا في الموبايل عندك انت ؟
قال ليها : صفر دولي ؟ انتي طالق و الله ما تبيتى فى بيتى .
المهم قام سمع الكلام جارو الجعلى المريخابى ، قال : يا راجل حرام عليك ذنبها شنو
قام الهلالابى قال : والله إن بقت اخر حرمة فى الدنيا تانى ما ارجعها
قام الجعلى قال لى المراة : على الطلاق انا اتزوجك بس تمى العده
اها قامت زوجة الجعلى قالت : الله لا كسبك يا راجى خربت بيت جارتى ، و بقيتها لى ضرة .
الهلالابي بعد سمع كلام الجعلي قال : والله امشى طوالى من دربى ده اشتكى عليك .
قامت زوجة الجعلى بعد ما سمعت انو الهلالابى سوف يشتكى ، كوركت ليهو بى فوق الحيطة ، قائلة : يا زول من دربك ده وعلى المحكمة اوعك تقوم تتاخر ، و يقوموا يرفضوا الشكوى .
قال ليها : طيب المشكلة انو زوجك حلف بالطلاق .
قالت ليهو : اسع امش اشتكى ، انتو جماعتكم بعرفو يسمكرو كويس بنلقى حل .
قال ليها : اسع انا حفيان
قالت : انت راجل التابه يا يمه هاك (جوز البراطيش ) ديل وقوم اتخارج
قال ليها : والله عرفيتها اكان قلتى البس نعلاتى ال 2 ديل ما كان مشيت
اها صاحبنا مشى مركز الشرطة لقاهو فاضى بس لقى شرطى قاعد براهو ، الراجل استغرب و قام سال العسكرى : يا اخى وين الضابط ؟
رد الشرطى : الجماعة مشوا يفرقوا مظاهرات الصهاينه بالفوز فى مدنى و بعض احياء الخرطوم فرقت الشرطة المريخاب المحتفلين
اها ما علينا قام سألو : انت ما مشيت معاهم مالك ؟
قام العسكرى شخط فيهو وقال ليهو : ما شغلك .
المهم الهلالابى قال ليهو : انا عندى شكوى .. ( قرقر قرقر ... الخ )
بعد ما سمع الشرطى الشكوى ، وقع من الضحك فى الارض وهنا استغرب الشاكى !!!

... وللقصة بقية ...
--------------------------------

منقول من سودانيز اونلاين , بتصرف

وحتى لو ما جات الصور , ما ضروري .
لانو الاعتراف سيد الأدلة , والراجل بلسانو قال :

تكملة القصة ..
الهلالابي سال الشرطي : في شنو البيضحك يا جنابو ؟
فرد الشرطي : لانو قبل شوية جانا مأذون الحي وقال الهلالاب الليلة ازعجوني , كل زول مطلق مرتو , وجارو المريخابي يحلف الا يتزوجها , والهلالاب يجروا على الماذون عشان يردوا زوجاتهم . المأذون قال اسجنوني في السجن عشان اعرف انوم .. وياهو دااك نايم في الزنزانة البي ورا ديك ... أمش اندمدم ونوم معاهو يا زول , مرتك خلاص طارت زي طيرة الكاس !!!