الزواج في الأيام الأولى .. والزواج بعد 10 سنوات

تشيرالساعة إلى 6:30 صباحاً
تودع زوجها وهو طالع للعمل وتقول له بالسلامة ياحبيبي
الساعة 11صباحاً
تتصل عليه في العمل وتقول له حبـيت اسمع صوتك بس ياعمري
الساعة 3 العصر
تستقبله وهي في أحسن هيئة ورائحة العطر تفوح منها وتقبله وهو داخل للبيت وتقول ليهو : الغدا جاهز يا حياتي ..تحب تتغدى الآن " ؟
الساعة 5 العصر
تصحيه من النوم بقبلة وتقول له اعمل لك شاي يا حبي؟
الساعة 6 المغرب
تغمض عينيها في حياء وتقول بكل خجل يا ريت يا حبـيبي .. يعني لوما في كلفة عليك .. يعني إذا تقدر توديني شوية لبيت أهلي إذا كنت تقدر يا عمري وقبل ما ينطق بكلمة: " إذا ماتقدر خلاص ما لازم نخليها وقت تاني "..
وطبعاً يضيع هو في نظرة من عيونها ويوديها لاهلها حتى لو ساكنين في أقصى منطقة .
الساعة 8 بالليل
تتصل على الموبايل وتقول: "اشتقت لك يا عمري .. يا ريت تجيني ونروح للبـيت".. فيقول لأصحابو : معليش ياشباب أنا راسي مصدع ولازم أمشي البيت
الساعة 10 بالليل
يتسامران وتقول: "الله.. يا حبي تتذكر ؟..
تتذكر أيام الخطوبة لما كنت تعمل المستحيل عشان تشوفني وانا أشوفك ، الحمد لله الذي جمعنا تحت سقف واحد
بعد مرور عشر سنوات
الساعة 6:30 صباحاً
هي في سابع نومه
الساعة 11 صباحاً
صحت من النوم مادة بوزها شبرين ووشها يلعن قفاها
الساعة 3 العصر
تستقبله وهي نافشة شعرها زي الشيطان الرجيم وريحة هدومها بصل وطبيخ وتقول: " شوف لي حل مع ولدك عبد الله ده ..حتى الآن ما حل الواجب ..
وفطومة بنتك دي الله ياخذ عمرها إن شا الله .. قطّعت هدوم المدرسة باللعب …
أديني قروش لازم أروح اشتري لها واحد غيره …
وعبد الله عايز علبة هندسه عندو إختبار رياضيات بكره
… وألاء وقعت بالمشاية حقتها والظاهر انها تعورت … لازم تجيب لي خدامة أنا تعبت .. الله يقطعك إنت وأولادك
الساعة 5 العصر
تدور مشكلة بين آلاء وعبد الله .. ويصحى هو على صوتها وهي تصرخ في وجوههم وتدعي عليهم بجميع الأمراض الخطيرة الحديث منها والقديم: "أخخخخ منكم الله يقطع العيال وسنين العيال .. مرضتوني وفقعتوا مصاريني الله يمرضكم .. أريتكم بالحمى اللي يلمسوها بالخشب .. أريتكم بالإسهال اللي يقدو ليهو العنقريب .. الله ياخدكم …ورمتو فشفاشي. جبتو لي وجع القلب
الساعة 6 المغرب
هو جالس يشرب شاي المغرب وهي تقول: "عايزة أروح أزور أمي لأنو بتجيهم بنت خالة جد ولد عم أبوي...وبعدين عايزين نروح نشتري للبنت هدوم مدرسة جديدة...وبعدين بنت عمي والدة ولازم أروح اشتري لها هدية ، وعايزة أزور أختي من زمان ما شفتها.
الساعة 8 بالليل
تتصل بالموبايل: "وينك الآن ؟ وبعدين وين بتروح ؟ ومنو اللي معاك ا ؟ وبترجع البيت متين ؟.. لا ما فيه!!.. الساعة 10 لازم تكون جوة البيت سمعت ولا أعيد ليك تاني ياراجل .
الساعة 10 بالليل
جالسين في التلفزيون ..أخيراً هدوء ...والعيال نايمين ...والجو جميل ..وفجأة تمد بوزها شبرين وتقول له: " أمك قبل كده في عرس سحر سلمت عليها وماردت علي .. يعني عاملة فيها تقيلة ولا شنو ؟ أنا ما محتاجة ليها ؟ صراحة كدة شايفة نفسها أمك دي .. والله تقول أنا قتلتليها واحد من أهلها .
وأختك شنو الحركات الببتسويها دي …ليه عازمة الجيران وكل حريم اخوانك إلا أنا ؟؟؟ ..
ما مشكلة أنا بسوي عزومة وأعزم الناس كلها إلا أختك … أصلاً هي ما زارتني في المستشفى يوم ولدت آلاء وانا فاهمة قصدها كويس
لكن ما مشكلة ..والله لو تطلع فوق راسها نخلة ما بزورها إذا ولدت ، وبعدين بنات عمك ديل منفوخين في الفاضي وبتاعين بوبار وهم مالاقين ياكلو من الجوع .. فلهمة في الفاضي ؟؟
على شنو أنا عايزة أفهم؟؟…. على جمالهم الزايد اللهم لك الحمدبس"..
نق نق نق نق نق (المره حنكها سنين وماراضية تسكت)
تسكت شوية وتقول: "وبعدين أختك محاسن يوم قالت إنو ولدي عبد الله يشبهني مايشبه أبوه قاصدة شنو بكلامها ده ؟"
ملاحظة : عبد الله طالع شين جداً
"أنا فاهمة قصدها، والله إذا ما بطلت الحركات والغمز واللمزأنا بسمعها كلمتين وأخليها تحترم نفسها…..
لا وكمان اليوم تقول أخوي محمد ( اللي هو زوجها ) حلو ووسيم و3 من حريم الجيران خطبوه لبناتهم زمان ….
عليك الله الناس دي شايفة فيك شنو أنا ما شايفاهو ؟
يسكت وما يرد.. تسكت هي ثم تقول: "وبعدين أخوك فتح العليم جاب لمرتو سلسل ذهب وغوايش ، وإنت أنا ما شفت منك غير المغسة ووجع البطن "..
يرد: "طيب أجيب من وين أخوي فتح العليم عندو قروش وربنا فاتحها عليهو ؟"..
هي: " إنت ما راجل زي الرجال ما تجيب قروش واشتري لي..ولا أنا ما بستاهل ..
تقوم وهي تبكي وتقول:" خلاص ماعايزة منك حاجة الله يلعن اليوم العرفتك فيهو
الساعة 11 بالليل
هي زعلانه ونايمة مع العيال وهو يلعن الزواج واليوم اللي تزوج فيهو

الزواج في الأيام الأولى .. والزواج بعد 10 سنوات
الصحيح
الزواج في الأيام الأولى .. والزواج بعد 10 أيام

ياخوي من أين لك هذا ، أنا عرفت إنت ليش خايف ، الشغلانية دي هنا تبع الجماعة ديل مش تبعنا نحن ؟ صحيح ؟شقي ومجنون .

ههههههههههههههههه
حرام عليك ربما تنطبق جلها أو بعضها على عينات من جماعتنا فلكل قاعدة شواذ والمرأة الكاملة في الجنة ... أما عن الجماعة ديل فحدث ولا حرج

عبدالفتاح بن سعيد كتب:: ياخوي من أين لك هذا ، أنا عرفت إنت ليش خايف

قصدك ليش عاقل

سيف الدين كتب:

عبدالفتاح بن سعيد كتب:: ياخوي من أين لك هذا ، أنا عرفت إنت ليش خايف

قصدك ليش عاقل

الزواج في الأيام الأولى .. والزواج بعد 10 سنوات 951658

مصداقا لحديث الأخ / الهادي ، أمس قاعد وصلت من العمل بدري والعيال في مراجعة دروسهم في الغرفة الثانية وأنا وأمهم في الصالة ، فقلت ليها : يا السمحة مدي لي الريموت عشان أنا متابع لي كورة كأس الخليج ، قالت لي: بالله ، مالك شارب ليك حاجة ولاشنو ههههههههههههههههههههههههه .
1- هل المشكلة فينا نحن .
2- أم فيهم هم .
3- أم في التربية والمجتمع ، يعني لمن أقول ليها ياحياتي وياروحي وياستم ، هل هذا ينقص مني شيئا ، أم تحسبه الزوجه كلام مصريين أو سوريين أو لبنانيين ؟ أفيدنا أفادكم الله .
4- كل ماذكر بعاليه .

هههههههههههههههههههه
الله يجازيك يا عبدو فقعت مصاريني بالضحك ... والله لو قلتها بحدة شوية(يا مره ناوليني الريموت) يقولوا ليك : ومالك قايلها بنهرة كده ... لا كده عاجبهم ولا كده عاجبهم

المشكلة فيكم يا عبد الفتاح , والدليل انها اتخلعت وقالت ليك :

عبدالفتاح بن سعيد كتب:: بالله ، مالك شارب ليك حاجة ولاشنو

تبادر الى ذهنها غياب عقلك سكرا لأن الكلمة غريبة على القاموس tongue

كغرابة تصرفات السكران

انتو عبد الله بن ابي السرح ما جاب معاهو حديث (الكلمة الطيبة صدقة) ؟
كلو من النوبة وقعوا معاهو اتفاقية البقط وقالوا ليهو ارجع , لو كان خلوهو دخل كان علمنا الكلام السمح

المشكلة مش في الكلام السمح ، المشكلة نحن إتجاه واحد سواء نحن أم هم ، والكلام المعسول سواء كان جد أو غير جد ماإتعلمناه من نحن صغار عشان كده إذا كنت جادي بفتكروك بتمزح يعني الحل شنو؟عاوزه ليها واحد نفساني ، لاتفهمونا غلط يعني بتاع علم نفس .

» قصه مغترب والزواج
» مالنا والزواج
» أود من الأيام .... المتنبي
» الزواج بعد 107 اعوام
» من نوادر الزواج