شبس الجنوبي

موضوع: شبس الجنوبي الأربعاء ديسمبر 08, 2010 7:56 am

ركبت مواصلات بري من أمام القيادة العسكرية , وذلك فترة دراستي الجامعية وفي قمة نشاطي وخفة حركتي , وهو طريق عودتها من البراري للخرطوم , وكما تعلمون أن مواصلات بري وإمتداد ناصر , تلكم البصات , آنذاك كانت باللون الأزرق ذات الصوت المزعج المميز ولها بابان كبيران ..

ولأنها عائدة للخرطوم , فلا طمع لي في مقعد ( والشماعة محمداك محمداك يا شبس ) وفعلا" وجدت نفسي في نص الركاب وماسك بيدي الشماعة في الممر .

ونسبة لذكاء الكماسرة عموما" , فإن الأذكي الذي يشحن أكبر عدد من الركاب ويكون ( عدل الفردة ) , ولسوء حظنا ( المشمعين ) وجدنا أنفسنا أمام أذكي مساعد ..

ففي نفس المحطة اللي ركبت منها وفي معظم محطات العودة , يطل علينا من الباب الأمامي ويأشر : يا إنت بالله ورا شوية

ويجي من الباب الخلفي : بالله , إنت يا , قدام قدام .

وبين ورا وقدام , وجد شبس نفسه وقد داس علي قدم أحد اركاب , وإعتبرتها عادية , فمع قدام وورا , متوقعة , ولطالما داس غيرنا أقدامنا ودسنا أقدام غيرنا ..لذا فلم أعير الموضوع إهتمام ..

وفجأة سمعت صوت : جنو يا .. مافستنا يا

الترجمة : ( شنو يا.. ماعفصتنا يا )

فعرفت إني أمام أحد الإخوة الجنوبيين والموضوع يحتاج إلي منطق.

فقلت له : ماشايفك ..

فرد بسرعة : بالله جوف .. زول تويل عريض ويقلي ماجايفك , كيف ماجفتني ؟

الترجمة : ( بالله شوف زول طويل عريض ويقول لي ماشايفك , كيف ماشفتني ؟

فعرفت أن الموضوع إتجه ناحية المنطق ..ولابد من مقارعة المنطق بالمنطق والحجة بالحجة ....

فقلت له : شايفك , لكن ماشايف كرعيك !

فرد بسرعة : أومال هكون واقف ألا جنو ؟

الترجمة : أمال حأكون واقف علي شنو ؟

فضحكت

فأردف : بالله جوف زول تويل لابس ندارة يقول ماجايفك !!

الترجمة : ( بالله شوف زول طويل لابس نظارة يقول ماشايفك !!

فضحكت وزدته من المنطق , بيت , فقد بادلته المنطق بالمنطق , لدرجة إنك لو حاضر لا تدري أيهما فينا الجنوبي وأينا شبس فقلت له : لأنو هي نضارة ( نظر ) عشان كده ماشايفك ..

( وبيني وبينكم منو فينا البيحق له حق التصويت في الإستفتاء , أنا واللا هو ؟؟ )

طالما الاتنين راكبين شماعة , يعني مهمشين ..
الاتنين لا يحق لكم التصويت

تصويت على شو؟

لايحق لكم الاثنين لا التصويت ولا الجنسية لكن يحق لكم اخذ اقامة واك واك

[ندعوك للتسجيل في المنتدى أو التعريف بنفسك لمعاينة هذه الصورة]
هههههههههههههه

يا شبس فقعتنا بالضحك بالرغم من أني دخلت الفيلم ده قبل كده من فم الراوي مباشرة (من فم شبس لأذناي مباشرة)
ودي نكتة جميلة طبيعية
بس كان تقول ليهو عندما قال ليك :
بالله جوف زول تويل لابس ندارة يقول ماجايفك !!

الترجمة : ( بالله شوف زول طويل لابس نظارة يقول ماشايفك !!

يا أخوي أنا نضارتي لابسة في عيوني ما لابسة في كرعيني

كده تكون أثبت إنك 100% رباطابي مسيخ
------------------
تخريمة :
في شمالي بسيط يبيع شماعات ملابس في محطة القطار
قابله جنوبي ودار بينهم الحوار التالي :
الجنوبي : ده سنو ؟
الشمالي : شماعات
الجنوبي: يعملو بيهو سنو ؟
الشمالي : يعلقوا فيهم الهدوم
الجنوبي : هههه إنت أبيط (عبيط) ولا سنو (نان يلبسو سنو؟)

----
شيس : نحن في انتظار مقال (أبو قرنين)